والله الدنيا دي غريبة خلاص

تشتري عداد الكهرباء.. وتدفع كل شهر ايجار عداد الفين ونص للسكني طبعاً
-----------------------------
تدفع ايصال مالي بمبلغ وقدرة والمحاسب يطالبك بي 1 جنيه دمغة لدرجة انو ما بيستلم منك المبلغ الا بي جنيه الدمغه
-----------------------------
بعوضة تجي تزعجك ........ وتمص دمك ويقولو ليك قروش مكافحة الباعوض (مبالغة طبعاً)
---------------هههههههه--------------
تصحى من النوم ....... لأن الكهرباء قاطعة ويقولو ليك عملناها سدود وكهربا
-----------------------------
تخش المطبخ ........ وتنسى انت اساسا في المطبخ ليه فتشرب مويه وتطلع
-----------------------------
عندك واسطة وتقيف في صف طويل عريض ......... بعد ما تصل الشباك يقولو ليك تعال بكره
-----------------------------
حتى لو بيتك ملك حر ........ فهذا ليس سبب يمنع بتاع العوائد - والعوائد تعتبر ايجار (يعني مشتري البيت ومؤجروا في نفس اللحظة)
-----------------------------
جنبك واحد بيدخن تقح تقح يقوم يطفيها ......... ويولع واحد تانية
-----------------------------
بتنزل في 95.7 ميقا والداونلود يصل 94% ........ النت يقوم يقطع
-----------------------------
الواطة بالليل والبرد شديد تخت راسك وتتغطى بالبطانية وتحس بالدفء ......... لازم تلبي نداء الطبيعة
-----------------------------
المكيف شغال في الغرفة وتكون معاك بطانية ......... طالما بردان أقفل المكيف
-----------------------------
توقف الاتوس (تكسي) ويقول ليك أي حاجة منك مقبولة .......... وأول ماتصل أي حاجة
تتحول الى ولا حاجة - يبدو انه تأثير المسافة واضح في هذه العلاقة
-----------------------------
بتحضر في مسلسل او فلم وكل شوية إعلان ......... حقوا يعكسوها وتكون المسلسلات والافلام في زمن الاعلانات
-----------------------------
هل تعلم أن جمارك السيارة 140% ......... يعني أن الحكومة لوحدها تربح
أكتر من تكاليف تصنيع وأرباح الشركة المصنعة والمورد والوكيل والسمسار
مجتمعين
-----------------------------
تضبط المنبه على 6 صباحا ......... وأول ماتصحى تدوس زر الغفوة .......... أضبطها على 6:10 من البداية
تضبط المنبه على 6 صباحا .......... وتصحى قبل المنبه بي شوية
-----------------------------
سؤال ذو حدين - أنت طوالي بتقول لي لا؟ - فلو جوابت نعم فأنت بتوافق على انك غلطان ولو جاوبت لا فانت الان أثبت انك بتقول لا.
-----------------------------
نشرة الأخبار كانت ربع ساعة ولكن الان يقال إنها اصبحت 24 ساعة - في الحقيقة هي عبارة عن نفس الربع ساعة ولكن مكررة لمدة 24 ساعة
-----------------------------
أول ماتعمل حاجة غلط في الكمبيوتر طوالي تجيك رسالة ........... ليه مابيقول حاجة لمن نعملها صح
-----------------------------
تمشي مناسبة في صالة (جم ،،،،)..... الصوت وكأن الجمهور أطرش ......... والباقي وكأننا خواجات
بعدين ليه دائما وبعد ما أبدأ أكل أقارن صحن العشاء بتاعي بالناس الجمبي فاذا كان أقل ........... أخفف السرعة
-----------------------------
في هذا الزمن لاتصدق كل مايقال ............ يقال أن ست ساعات نوم كافية .......... يبدوا انها اشاعة اخرى
-----------------------------
منظراتية البلد دي لديهم مقدرة مميزة جدا ......... عندهم لكل حل مشكلة
-----------------------------
سبايدرمان عضاه عنكبوت واحد بس بقا الرجل العنكبوت ....... كان جا هنا كان
90% بقا الرجل البعوضة والباقي أما الرجل الكلب - الرجل الفار - الرجل
النمله - الرجل الشافع ....... والقائمة تطول
-----------------------------
انت وزوجتك طالعين مشوار ..... اذا قالت ليك انا لبست انت البس ........ اضف على الاقل نصف ساعة حتى تطلع
إنتهى المشوار ....... إذا وصلت الباب أعمل حساب الونسة الجمب الباب ........ والتي قد تأخذ اكثر من زمن تواجدكم الكلي
-----------------------------
عاوز تلقي شغل؟؟؟ انت محتاج لي خبرة والخبرة محتاجة ممارسة والممارسة
بتجي مع التدريب والتدريب محتاج شركة والشركة محتاجة واسطة ......... من
الاول كوس ليك واسطة
-----------------------------
تسمع في الراديو ... فتأكد تماما ان أول حاجة يقولا المذيع للمتصل
.... لو جمبك جهاز راديو اقفله واسمعنا مباشرة من التلفون ... وعمرهم
مايخلوا الحركة دي
-----------------------------
يلاقيك واحد بيشبه زول من اهلك في عرس ويناديك باسمك ويسلم عليك ويقول ما عرفتني؟؟؟ ...... أنا شلتك لمن كان عمرك سنتين
-----------------------------
القضية الفلسطينية ...... اذا كان خبر الهجوم الاسرائيلي الاخير تذيعة
واحدة بكامل حلتها ...... فاكيد حتعمل عمل المخدر أو تصرف اهتمامك ولو
قليلا
-----------------------------
تشوف يافطة المطعم ...... وتلاقي صورة الجداد بأبعاد ومكونات مختلفة تماما عما ستراه لاحقا
-----------------------------
كل شئ يدور عكس عقارب الساعة ..... من الأرض تدور حول نفسها وحول الشمس
وبقية الكون كذلك, حتى الذرات والناس في الحج وفي سباقات الاولمبياد ولا
أعلم شيئا يدور مع عقارب الساعة الا عقارب الساعة نفسها .... كان يختصروا
الموضوع ويغيروا اتجاه حركة الساعة

والا رايكم شنو

تحيا كتير تشوف كتير بس قول يافجاج

يا فجاج تفجها
شكرا هشام علي المرور

» القاب غريبة ومتوارثة