في زيارة للعاصمة القومية الخرطوم وبينما انا وصديق عزيز في عربة الموصلات طلب الكمساري قروش العربية ودفعنا للكمساري والكمساري عمل ميت بالباقي ، صاحبي ده زول لايوق زي ام رقيقه شبك ليك الكمساري اسمع ادينا الباقي الكمساري نكر "حطب " اصلو ما عندك باقي عندي والشكله دورت وانا شغال اهدي في صاحبي "يا اخينا الباقي يطير خليهو " قال لي والله ما بخليهو طبعاً حرب داحث والغبراء دي كلها في مية جنيه اها الشكله بقت في الواطه قدام الحافله السواق قام دفرني بالحافله وانا طقيت ليك القزاز والقزاز رقد رز وهنا اي زول خانق ليهو زول وقف وكلهم بعاينو لي السواق قال "لا لا القسم طوالى "اخوكم خمشوهو وودوني القسم .
المتحري شابكني إنت بتاع مشاكل مش الليله ارجى الراجاك ارفع يدك فوق "بركتوني" وشالو اي حاجه في جيبي وقال لي اقلع القاش يااخينا اقلع القاش كيف اسي لو بنطلوني "نصل " اعمل شنو شبكني امنع الفارغ إتوكلت على الله وانا بتمتم بعبارات إستنكار بعد داك فتح الحراسه واداني دفره تقول فاكني بنشاب وقفل الباب ولحدي هنا انا حاسي إني بحلم بحلم وجوه الحراسه القى ليك أًناس ركلهم التاريخ وهنا إتزكرت ليك المسلسلات لما الواحد ادخلوهو السجن بلقى رئيس العصابه وبتلمو عليهو وبدوهو علقه جامده وبعد داك بعرفو سبب الإستضافه شنو طبعاً عملت بمبدا الهجوم خير وسيله للدفاع وبادرتهم بالسؤال " يا جماعه المعلم فيكم منو " اي واحد يقول انا في سري قلت كلكم "ظعيط ومعيط " قالو لي اقعد كدي واحكي لينا الجابك هنا شنو هوانا جيت براي للنزهه ما جابوني بالقوه قلت ليهم انا جيت في شكله وكسرت قزاز الحافله نط واحد وبضحكه من الاعماق وقال لي " إنت المهلهل ده كسرت قزاز حافله سبحان الله" وهنا اخوكم خلاص قرب إنط ليهو في رقبتو لكن قلت ما ازيد الطين بله .
بعد داك اي واحد بقي يحكي لي جابوهو في شنو البقول لي جابوني في شيك والبقول لي انا ما دفعت قروش الايجار لي خمسه شهور واحد جابوهو واقف ديك مكوه واحد عامل فيها مصلح ديني شاف بت بعرفا ماشه مع ولد مسك الولد جلدو والحراسه تسع الجميع .
اها ياجماعه الزول الفارز عيشتو وقاعد براهو داك مالو قالو لي ده كتل ليهو زول وبكره مرحلنو لسجن كوبر هنا اخوكم لملم طرفو وقطع حس وقلت في نفسي يقوم يقول الزول النضام ده اكتلو اصلي ميت ميت
اها في واحد من المساجين نظام داير يوريني الخدمات في الحراسه كيف قال لي شفت الجردلين ديك واحد فيهو موية شراب وخلوها بالنيه " .
كانت ليله مرصعه بالسواد واخوكم جاهو إحساس بإنو ما إنسان وجاني اخوي نظام بيواسيني وشابكني " السجن للرجال " مديت راسي للحراسه الجنبنا القى فيها نسوان والنفسيات رقدت واطه .
الصباح جا الرقيب النبطشي وقال إنت وإنت وإنت قومو قشو الحراسه دي وانا من ضمن الناس المختارين للمهمه الصعبه دي وقلت ليهو انا عندي حساسيه قال لي حساسيه في عينك الليله تقش براك واداني المقشاشه طبعاً الحراسه بتفوح منها عطور باريسيه اصليه
وبعد حجة وعوك عوك وتدخلات خارجية قاموا طلعوني وقمت ودعت الناس الفي الحراسة ومشيت البيت اشعث اغبر وانا خاشي على بيت عمتنا القى ليك فلانة شمار في لجنة الاستقبال والمراسم قامت ضحكت ليها ضحكه فيها سخريه وقالت "هي إنت القلنا عليك مسكين طلعت بتاع مشاكل "إن شاء الله سكين في بطنك كان ما السجن حااااااااااار كان جلدتك .
وللقصة بقية
بتوقيت السودان
الجمعة أغسطس 19, 2016 2:41 pm من طرف 
موضوع: غشوني وقالولي السجن حق رجال 
