استعجلي وخشي القليب

تذكير بمساهمة فاتح الموضوع :

بتنفسك في الضيق شهيق يا أحلي من طعم التمر
يامالية قلبي حروف يقين من الصباح واليوم يمر
نشوان بكون في حضرتك وإتهنأ بيك طول العمر
يابت رقيقه كما الزهور نديانة والحال فيك يسر
ما أجملك والله جد لمن خطاكي تجيني من بعد العصر
وعند المغيرب توصلي تلقيني مت من الصبر
صبري العليك ماصابرو زول صبر السيوف في يوم بدر
أصحابه شادين القتال دايرين من المولي الأجر
تسمع صليلا وري الجبال تحلف تقول يا الله كر
إستعجلي وخشي القليب أناحالي دونك أصلو مر
مافيهو حتي طعم حياة ومن غير عيونك مابيسر .

طالما ان هنالك تقارب في وجات النظر والحب العميق للراحل المقيم حميد
اليكم بعض الكلمات التي احس بانني كتبتها بلسانه
مع وضع الفروق بين القلمين
نظامكم ياضلالية نظام السحت كلو نفاق ...
ولو قررنا نحنا نثور بنطلع ناس شذاذ آفاق ...
أنحنا حلفنا مانسكت ولا نصبر علي العيشه اللي مابتنطاق
رجال نحنا وضكاري يمين نسد عين الشمس إشراق ...
ولابنخاف سلاح بوليس ولا بنمل من الساساق ...
نحب هادي البلد بالجد نوهدبا من قلوبنا أشواق ...
غلابه تعابي سهرانين بنفدي بلدنا بالأعناق ...
من السرق العرق والحق صدرنا يمين عليكم ضاق ...
وفي الآخر يبين الحق عكارنا بيصفي بالرواق ...
تغور دقن الضلال وتفوت ولا أسفا" علي الإطلاق

كان لابده من أكتب
مهما أكون تعبان
شان ستو تستاهل
أملاها شوق وحنان ...
تعبي العلي هييييين
بيهون عشان إنسان
أداني حنو كتييييير
ضماني بي تحنان ...
ستو الحلم كلو
ولابده أوصلو
شان ستو هي أقلو
أجمل بني الإنسان ...
أنا روحي دار تمرق
حايشيلا ملك الموت
كان لابده من أكتب
قبال رويحتي تفوت
وأملاكي أحرف شوق
صادقات مدي الأزمان ...
ياستو ضميني في حضنك
الدااااافي
أحميني من دنيا سرقت
من أوصافي
شالت مشاعري زماااان
وانا زاتي كت مافي
ما الدنيا أعيتني
وأنا هسه زول عيان ....
لابده من أكتب
أحرف تفيض ريده
شان ستو إنسانه
عمرانة بالريده
رغم المسافه البين
قلبينا هي بعيده
وممتده في الخاطر
إحساس طري ونديان ...

صاحب البوست يعتزر ليومين القادمين ان شاء الله


سوف يبتعد لو قليلا لاسباب عقد العريس اشرف كردي
ترقبوني قريباً

شلته أحزاني وفقدتك
ياحبيبه تفيض معاني ...
والحزن فارد شراعو
في بحر كره المواني ...
وكل مركب ريد تعدي
تشتهي الدرب اليودي
لي عيون ستو الأماني ...
ستو ماظنيت تعرفي
إني غيرك زول بعاني ...
بفرد الدمعات وساده
والتعب محتل كياني ...
وأفضل أرجاك ليلي كلو
وأحسب الليل بالثواني ...
شان عيونك يوم يطلو
أبقي صاحيلن ..... أقلو
يا البعادك كيف أزاني ...
ستو جمبي ولا يهمك
أخدي راحتك وكلميني
نحنا ناس الله البنضحك
رغم جور حزنك وسنيني
ورغم محنتنا العلينا
برضو نكتب في الأغاني ...
ستو ضحيت شان غرامك
بي وطن ضاق المراير
فيهو مولودين غلابه
تلقي بالم ديمه حاير
ويوم يضيق الكون عليهم
يدمنوا النوح والسجاير
وطالما ضحيت عشانك
إنتي برضك ضحي شاني ...
ستو والناس اليتامه
أغلي عندي من الجواهر
ستو والناس التعابه
فيني ريدم بان وظاااااهر
وأي زول داير يشوفو
يرجي آخر الليل يساهر
لمن النجمات يمرقن
في السما وزي الأزاهر
يوم تغيب ستو وتودع
دنيا عاشت بالمظاهر
أصلو ستو قمر بلادي
لليغالط واليكابر
ستو غنوات ماها ساقطه
ماشعر يتقال وعابر
ستو كلمات مارقه تدي
وتبقي زاد لي كل مسافر
تارك البلدات مهاجر
من وطن مجروح يعاني .

شلت أحزاني وفقدتك في زمن كره المواني وكل مركب ريد تعدي..
شكرا كردي ستار ومذيد من الإبداع

بلسم كتب:

شلت أحزاني وفقدتك في زمن كره المواني وكل مركب ريد تعدي..
شكرا كردي ستار ومذيد من الإبداع

تحياتي بلسم
حضورك ومرروك اسعدني

لو جيت أفتش ليكي أنا
حا يبقي تامن المستحيل ...
معقول أعود أنا من جديد
لي زوله فاتت من قبيل ؟
إنسانة مابتعرف وصال
وماقدرت دمع الرجال
زول ضاق جمال الدنيا كيف
من تاني يرضي يعيش ذليل ؟
العيشه في كنفك عذاب
في دنيا غرقت في السراب
أنا كنت عاديك أمنية
لكن طلعتي وهم عديل ...
أنا كنت واقف وبندهك
ناديت عليك نبهتلك
لكنو صوتي طلع حزين
مجبور أفتشلك بديل ...
ومشيت وحلمي معاكي ضاع
يابت بتنسج في الخفا توب الخداع
غداره خاينة ومجحفه وبلا نفاع
يازوله تنهش في حشاي زي الضباع
مابتعرف الصبر الجميل ...
الدنيا مابتقيف عليك
ماترجي إني أقوم وأجيك
أنا من زمان كان رايي فيك
إنك ولاكي شبه مقيل ...
يكفيني عاشق ها البلد
ماظني غيرو ألاقي حد
أنا ود بلد ومن ها البلد
ماببكي قلبي الإتهرد
أنا صبري زي صبر الخليل ...
إنتي الحتخسري للرهان
غداره زي طبع الزمان
لا ليكي عشره ولا أمان
وأنا لسه إنسان برضي نيل ...
غيرك بريد أنا من جديد
طيف ستو بان ييداك بعيد
جاياني من زمنا" سعيد
تملاني ريد حتي الوريد
وهي القادره لي
ماضيك تزيل ...

اذا ماغبتي من دنياي
ده حالي وراكي ياستو...
بكون إنسان وعايش ساي
وعايني براكي في الصوره ...
بقلع قلبي بي دقاتو
وأودع زي روايع فاتو
سابو الدنيا شان هي بلاك
مسيخه وتبكي معبوره ...
قلب زي ده محال
حيخشو غيرك زول ..
قلب مديكي أحلي وداد
وماعرفت ورودو ذبول
تعيشي براكي يا ستو ...
أنا الجيتك وعليكي دخيل
عليكي سلكته مجري السيل
ورمال الوادي مافي ضليل
سموم وهموم أواخر الليل
مسافر وجايي ليكي رحيل
أفتش ليكي وينو شليل ؟
لقيتك تبكي معبوره ...
سألتك شن مبكيكي ؟
إجابتك واضحه في عنيكي
وكان وجعك من الفيكي
وجع باااااااااين مغطيكي
من التعب الغدر بيكي
قلم تصحيح وسبوره ....
بتشرحي إنتي في الخاطر
تعاقبي الناسي مو فاكر
وإذا ما الفسحه حانت ليك
تقيفي تقيفي مأموره ....
تجيني براكي بالأشواق
تحاربي زمن قدر ماضاق
تضيق الدنيا بي سوره ...
بحبك وإنتي بتغيري
ولاك مهتمه بي غيري
براااكي الشاغله تفكيري
وموسمه فيني تاج وإكليل
نجيمه تضوي دبوره ...

غدارة خاينة ومجحفة وبلا نفاع..
شكرا كردي ستار ومذيد من الإبداع

براحات من زمن أبيض
يرشن فوق حلم أخضر
صباحات خير فرح ميمون
علي طيف ريدنا يتحدر
جديولا" يدفق الألحان
غنا ريده وعشق أنضر
مواسم بالبشاره تضج
عصافير بالفرح تنسر
غمامات بالرجا الفياض
تمطر في البلد تنشر
عويناتك درب واضح
يودي الزول علي عبقر
ويدهشن القوافي فيوض
معاني تموج وتتصور
أهم بي إني أحلق فوق
بدون جنحات ولا أخدر
أمد جنحي القصيد وأطير
وكل مادرته حا أقدر
علي دنياك يسوقني الشوق
أتوه في ليلا وإتودر
أساسق فوق مدن من نور
أملأ عيوني وإتمنظر
أستف خاطري بالغنوات
وأطن بالنمه وإتبختر
أخوجل فوق تراب من عز
مهيلا" باحو مابصغر
أغني مع الطنابير حن
دليبنا الحامي وكت ينهر
ولا جنس البقول آآآآآي
غنا بلدي الغنا الأسمر
مغبش ويألف الجالوص
لا إتنطج ولا إتكبر
لا إتعرجن ولا إتمايع
ولا شاف الهبوط بالمر
وأغنيلك غناي أغبش
وطاعم بالصدق وأنضر
حنونا" زي هوامع الغيم
علي الجدبانه والأخضر
علي العطشان يصب روحو
ويضوووووووق الشر
عشان كل البلد تشرب
وعشان كل الزرع يخضر ...

منحوته صورتك في الفؤاد
مين البيقدر يمسحك ؟
وماطالا رسمك في القليب
مافيش زمن حيجهجك ...
لا آفة لا عارض يجيك
مادمته وحدي البندهك ...
يا ستو نحنا بشر نريد
وساعة نريد بنريد بشر
صادقين وراضعين الوفا
من نيلنا والليل والقمر
ناس بالضكاره نحيرك
زي التقولي ولاد عمر
سيد العداله أبو الجهاد
كانت دموعو تسيل مطر
لو شافلو زولا" نام جعان
ورابط علي بطنو الحجر
نحنا الشمال بلد النخيل
المنقه والزول البحر
ويا ستو بعد القلتو ده
رديلي قاااعد وبسمعك ....
يا ستو نحنا شوايقه جد
عايشين وراضين بالنصيب
لا فينا زولا" عاش بخيل
رغم الوطن والحال صعيب
ناكل حلال وعرق جبين
مانا النسوي الشين وعيب
ولو متنا جوع في ها البلد
تلقينا نكرم في الغريب
أصلو الغريب شيطان وبس
والجانا كلو بكون حبيب
وياضل بيوت أهلي الحنان
الفاتحه راجه اليدخلك ....

إستحيت يوم هل نورك
وخفته تجرحني إبتسامه ...
أنا ممكن إستحمل غيابك
وماني رامي عليك ملامه ...
إلآ خايف يوم فراقك
يحزنوا الأصلا" يتامه ....
الزمن من غيرك إنتي
بتتقطع أرجل خطاهو ~
زي كسيح متهدي حيلو
الحزن والخوف عماهو ~
ستو شدي الخطوة خُبي
وأبقي في الدنيا السلامه ....
لو بتسألي عني إنتي
أسألي المسا والليالي ؛؛
عشته بحلم بي لقاكي
وإنتي فوق ساكنة العلالي ؛؛
ياقمر في سماي مضوي
وهو الوحيد ساتر لي حالي ؛؛
فيهو بسرح ليلي كلو
رغم تعبي وإنشغالي ؛؛
ويومي تغيبي خسوف أظنك
ما بتفارقي ثواني بالي
رغم دنيتنا وظلامه ....
نحنا إتربينا نرضع
من ثدي الأشواق أماني ~
ومابنخاف من حاجه أصلا"
جينا من رحم المعاني ~
ناس بنبكي الدنيا فرحه
بالشعر وأحلي الأغاني ~
إلآ شوقك ستو جواي
هو الوحيد الجد أزاني ~
وكت بشوف الدنيا حلوه
وحدو شوقك هو العماني ~
شوقي شوق الشوق وشوقو
معني والأخلاص تفاني ~
في وطن مليت حروبو
والبرئ الفيهو جاني ~
والنظام الحاكمو يحكم
بي حكم زولا" أناني ~
ولا بيراعي حقيق غلابه
لا مساكييييييييين لا تعابه
والنظام الشفنا هسه
باقي لا يوم القيامه ....

حبيب إخترتو بالمهله
ومحال ألقالو أي مثيل ...
حبيب نقيتو من آلآف
لأنو إنسان عفيف ونبيل ...
أنا البنت البتحلم تلقي
راجلا" زي جمال الشيل ...
يقيف ويحارب الدنيا
إذا ما ضغته يوم الويل ...
وياما بنات كتااااااار زيي
يفتشو في المآسي ضليل ...
ضليل راجل ولا ضل حيطه
في زمن العذاب والويل ...
وأنا المحظوظه في دنياي
لقيت ضلي ووريف بالحيل ...
حبيب شايل هموم وطنو
دموعو عشانو نزلن سيل ......... ؛؛
حبيبي الحابه كلماتو
بحب شعرو وحكاياتو
أنا الحبيتو شان زاتو
وكتير أنا شلته آهاتو
عشانو مساهره طول الليل ..... ؛؛
حبيبي يقيف يسل سيفو
إذا هبت رياحي وجيت ..
يكاتل الدنيا بي حالا
إذا في لحظه شافني بكيت ..
عليا يغير من النسام
مناي في حضنو ألقي مبيت ..
وأجيبلو بنات وكيف حلوات
وأكون لي حلمي دابي لقيت ..
وأكون حققته كل مناي
وأصل زي ماقبيل طشيت ..
وأهدي ليهو كل جميل ........ ؛؛
هسه يكون يفكر فيني
رغم البينا من فرقه ..
ويحلم بيا ماسك إيدي
إذا في يوم نوي المرقه ..
وعارفه كمان هو قاعد وين
وشايفه أشعارو منطلقه ..
بيكتب فيني أحلي كلام
يشبه فيني بالنسام
وكتير أبقالو أحلي غمام
ما أنا ستو وعليا سلام
أنا الضو والبقية ضلام
تهيج أشواقو زي السيل ....... ؛؛
مناي يايمه يبقي سعيد
منايا أضمو فيني شديد
وأفرح زيي والأطفال
كمان الدنيا لسع عيد
قسم بالله شوقي يزيد
عشانو عرفته كيف الريد
ستو أنا وحبيبتو أكيد
وإذا ما الدنيا لمتنا
مناي لي حزنو أقدر أشيل ؛؛؛؛؛

ستو ،،،،،

ماطالا أصلك ماكي في
سايباني ليه شديت رحال ؟
ومشيت علي دربك سنين
وحلت خطايا علي الرمال ...
لكن بقولك ياحبيب
وأطرح عليكا فرد سؤال :-
إشمعنا لما الليل يطول
بتجيني دايما" في الخيال ؟
وليه إنت من دون الخلوق
عندي الوحيد مضرب مثال ؟
جاوب براك ...

زي ماقالت ستو:
حبيب إخترتو بالمهله ومحال ألقالو أي مثيل..

يابنية رقيقه إنتي
جيتي داخله بياتو باب ؟
وياتو مدخل فيني شالك
وأنتي زولة كما السحاب ؟
ستو والأيام بتكتل
فيني بالشقا والعذاب ...
وكل ما حاولته أعرف
ليه أنا ودون الشباب
فيني بتموت الأماني
وديمه قدامي السراب ...
ستو إنت وطن مدفق
بي حنان كل التعابه ..
إنتي في بلدي اليمحن
فرحة للناس الغلابه ..
ياحجا الأطفال وبهجه
طالعه من وتر الربابه ..
جايي كلك خير ونعمه
وين مثيلك ياسحابه ؟
مالية بي مطرك بيوتنا
وشايله مننا ها الرتابه ..
جيتي واليحكم بلدنا
زي تكننا جوه غابه ..
يوم قوينا يدوس ضعيفنا
تبقي في الدنيا الغرابه
ويبقي عالمنا إكتئاب ......
نحنا ناس عايشين بنحلم
بي وطن آمن براح ..
بي بلد بالإيد تسالم
لا زخيره ولا سلاح ..
نحنا ملينا البنادق
فينا يومي تراح تراح ..
والصواريخ التهدم
في بلد أصلا" قماح ..
وفيهو كل الناس تعاني
والقلوب شبعت جراح ..
والليالي سوادا يلحم
عمرو ماجاها الصباح
رغم فقدنا والمصاب .......
ستو يا أملي البيبرق
في سماي إنتي المطيره ..
يافرح طاف بالمداين
والقري الكيفن كتيره ..
والصحاري الناشفه دونك
والفيافي هناك غفيره ..
في رمالك تلقي شفع
يوم بطانك قيره قيره ...
يجروا في مطرك حفايا
فرحة شانك يامطيره ..
ستو يازغروده طالعه
من حريم كل العشيره ..
يوم يمرقن لي زفافك
بالعديل جايات في سيره
ليكي والإيدين خضاب .......

روعة

بلسم كتب:

وكت ضليت وكمل الذاد ..
حروف الزكري كانت ذادي والميعاد..
شربت دموعي وإتوسد وسادك كان أعز وساد..
ما أجملك ستو وأنت تخرجين تلك الدرر من كردي ستار..

شكرا بلسم علي روعة مرورك
تحياتي

وكتين يغيب قمر البلد
والدنيا تغرق في الضلام
والكون سوادو سواد عجيب
والناس تتوه وسط الزحام
أنا .. أنا .. أنا بفقدك ....
يا ستو وحيات شوقي ليك
متمني لحظة أشوف عنيك
وأحضن أناملك أبوس إيديك
ولو الله حقق لي المراد
أنا .. أنا .. أنا بحضنك ...
جيتك معبأ حزن وأنين
من دنيا عدمانه اليعين
وأنا فيها ميت من سنين
ومادام ضميرك لسه حي
أنا .. أنا .. أنا بعشقك ...
ستو الحقيقه الماسراب
يابت بعيده كما السحاب
ياداخله بتفج العذاب
ومادمتي إنتي حبيبه لي
أنا .. أنا .. أنا بدخلك ...
أوعك تفكري في سواي
ياجارية في شريان دماي
متمني لو ألقاك معاي
ولو ربي حقق لي مناي
أنا .. أنا .. أنا بسعدك ...

رائع

إذا كان مصعد الوصول معطلا
استخدمي السلم درجة درجة

نار أشواقنا الكانت واقده
ماتت بعدك وشبعت موت ...
وكل ما أحاول أولعا تاني
ألقي البينا رقد هبوت ...
دنيا عجيبه وحاله تحير
لمن تقطع صوره وصوت ...
أنا شخصيا" عشته برايا
وياما الكون مليان بنوت
لكن أبدا" ما إتوقعته
لحظة حبيبتي تعدي تفوت ...
تمسك سكه صعيبه بدوني
والأشواق البينا تموت ...
هاهاها أحسن أضحك
والضحكات الطالعه خفوت
خجلت زاتا وكت ماشافت
الإنسان يقلب لي حوت ...
يبلع ويآكل حق الناس
لا في ضمير
لا برضو إحساس
وياااااما هدم لينا بيوت ...
نحنا غلابه وبرضو طيابه
نسكن جوه بيوت الطين ..
ساترين حالنا وبرضو نغني
وربنا وحدو اللينا يعين ..
ناس إتربوا علي التحنان
وفينا العشره أمانة ودين ...
ولما نريد نختارا حبيبه
زوله تحب بي قلب حنين ...
زوله تخشك تفتح قلبك
تقعد تخلف للرجلين ...
ياهو مكانا وأصلا" ليها
وياااااما صبر راجيها سنين

دنيا عجيبه وحاله تحير

ونست بيكي الحاضرين
وحكيت حكاويك للغريب ...
يا أحلي من طعم التمر
وكتين يحتو الهمبريب ...
ياجاده في الزمن الهظار
يابارده كيف والدنيا نار
يابت ملك وغيرك إيجار
في ها البلد إنتي العمار
ياداخله فيني من المسام
مستوطنة الروح والقليب ...
ستو الأماني الوارفه
في دنيا عدمانه الوريف ..
إنتي الوحيده الفي البلد
شايفاني والغيرك كفيف ..
وأنا زول مستف أغنيات
راجيكي يافصل الخريف ..
راجيك تجي وتهدي البلاد
يابت مزاجي وأحلي كيف .
وياريتني لو شفتك زمان
كانت جراح قلبي بتطيب

السهر مامن عوايدك
حقو إنتي تنومي بدري ...
وفي الصباح تبقيلنا نسمه
مافي بينك وبينا كبري ... ؛؛؛
ستو في زمن التناقض
ثابته في كل الفصول ..
واضحه زي قمر الليالي
وباينة في عين العزول ..
ستو أمرقي ولا عليكي
والدار يقول خلي اليقول
أصلك إنتي حبيبه ليا
رغم سنواتنا البتجري ... ؛؛؛
كل ما تشرق صباحك
ألقي شوقي عليك يزيد ..
ستو يالفرح المهاجر
في بلد مجروح شديييييد ..
واليتامه ينادوا ليكي
وإنتي أبعد من بعيد ..
عودي لي شفع بيبكوا
أبقي ليهم إحلي عيد ..
في بلد والفرحه مافي
حال مميل ماهو دغري ... ؛؛؛
لي متين نقعد نعاين
وفي الوطن يوماتي جرحه ؟
وياحليلكم ياغلابه
ديمه باكين مافي فرحه ..
تعصروا الجوع اليقطططع
في قلوب عمرانه سمحه ..
والبطون عشمانة لقمه
مامهم إن شاء الله قدحه ..
وتموا باقي الفاضي موية
ما الزمن بي طبعو فقري ... ؛؛؛
الغلابه الفي بلادي
عدهم قدر الرمال ..
في الصحاري وكل وادي
في الأراضي وفي الجبال ..
في الرواكيب البعيده
ديل عذابم ضمه طال ..
لا كهارب ضاربه تضوي
والبرق ييدااااك شال ..
والرعود بالليل تخوف
شدوا حيلكم يارجال ..
ما المطر وكتين تدور
حال بيوتكم ماهو حال !
ما السقوف الفوق بروش
ماها زنكي عشان يحوش
والبيوت ما ليها حوش !
مافي حاجه بلا القشوش !
ساعه ساعتين حاتعدي
والمطر وقفت والسلام ..
والبنيات حا ترتب
كل حاجه وبي نظام
كل حاجاتم بسيطه
لا قزازه ولا رخام
فجأة كل الناس تضاير
تلقي كل بيوتا قامت
والرواكيب واقفه ترقص
والبطان من بدري نامت
تبدأ تحلم بي جديده
فرحه في البلد العنيده
ياهو حالك يابلادي
ستو خليكي وقصادي
نسمو بالأشواق ننادي
ويوم أموت يا ستو عاوز
ألقي حضنك ياهو قبري .

نار أشواقنا الكانت واقدة ماتت بعدك وشبعت موت..
شكرا"كردي ستارللكلمات الرائعة

بلسم كتب:

نار أشواقنا الكانت واقدة ماتت بعدك وشبعت موت..
شكرا"كردي ستارللكلمات الرائعة

ﻫــﻞ ﻭﺟــﺪﺕ ﻓــﻲ ﺣـﻴــﺂﺗـﻜـ ﺷـﺨـﺺ ﺃﺣـﺒــﻚ
ﺑـــﺼﺪﻕ ؟؟؟

ما إقتبسته انا هذاماخطته يراعك

أصلو ريدك باقي فيني
دغري لا يوم القيامه
وحاتظلي أصيله إنتي
وتبقي في السفر السلامه
وأغنيات موزونة تحكي
وقولا واااااضح في كلامه
ويبقي عنوانك يوضح
أحلي قصة وإبتسامه
في خديد نديان يضوي
في دروب ناسا" شقية

معاك زمن الفرح تواه فقد معناه ليهو سنين
وأريت الماضي لو ننساه ويكون قدامنا صبح الحين
عذاب قلبي المحق في بكاه قساوتك وإنتظار أمرين
فراق كان للأسف عشناه وحصادنا المنو فرقه شتات
تصدقي ماقدرته أشوفك مجرتقه وإنتي سايره عروس
ونشف عرق الهوي البتق في أطيب أرض مغروس
غريبه نقول زمن فرااااق ونحنا علي الفراق بنكوس
تسيل دمعاتنا تتدفق وكيف بتفيدنا يوم دمعات ؟
عيونك ليه علي تقسي وأنا العلمتها الأشواق ؟
وقليبك كيف يجور ينسي ويسيبني أنا فوق جمر حراق ؟
وحيد خلاني دون مرسي أقاوم في زمن فراااق
وعايش فرقتك هسع وكيف أحوالي في الجايات

لقيتك مارقه من فج الأرض عنوة
وتباصري العيشه بالدعوات ...
كأنك من وراء الدنيا
ولا زمنك زمننا الفات ...
وقف محتااااار زمانك فيك
بعد ما اتسطرك غنوات
غناوي بتطرب السامعين
وحاتك ضمه تملأ العين
غناوي علي زمن جايط
ولا متل الغنا الهابط
شعر موزون مع الكلمات ...
وكيف يا ستو أعبر ليك
علي الجوايا من أشواق ؟
وكيف أقدر أدوزن بيك
إذا ماليك دوام مشتاق ؟
أذتني السكه في بعدك
مليت كل الدروب ساساق ..
وستفتك معاني جميله
ما بتنقص علي الإطلاق ..
إذا نقصت يكون
كل الكلام ممحقوق
علي الزمن البلا أخلاق ..
زمن جوايا أصلا" مات ....
ستو الموية واللقمه
علي بطن اليعصرو الجوع ..
ستو المعني لي إنسان
وفي وصادق دوام موجوع ..
يعيش في ها البلد يكتب
وكت يبقي الكلام ممنوع ..
يقيف ضد النظام وإبليس
كلاب الأمن والبوليس
محال يقبل يعيش وتعيس
ولا بيقبل ولاد بلدو
يموتوا كما الغلابه فطيس
وعلمك ياوطن مرفوع
يرفرف فوق مع النسمات .....

تصدقي ماقدرت اشوفك مجرتكةسايرةعروس..
ولابحصل حتي إن نخرعمري السوس..
لي غيرك حبيب عمري ماببقي عروس.
ولي غيرك خطايامابتمشي تدوس..

انت الفرح وانت الامل وانت الامانى المطلقة
وانت الهدف فى كون بقت اهدافو ماها محققة

انت الحقيقة المابتموت..
انت الأماني الفي الوجود..
لكني ماأظن لي مكان وستو ساكنةجواك عاد بي وين افوت..

مهما السنين سرقتني أيام الشباب أنا بعشقك..
مهما الامل من تالاي غاب..
أنا بعشقك من غير حسااااااب..

ياقلبى مين ظلمك وما حس بى ألمك
استعجلى وخشى القليب
القليب راجيك

غريبه نقول زمن فراق ونحنا علي الفراق بنكوس..

اوعا خاطرك يوم يظن انوخاطرك عن خاطري بيغيب..

نبرات حديثك يوم ترن
كل الفيافي تقوم خدار ...
والصحرا تتخابت مطر
والواطه تتعمر نضار ...
صوتك بدايات للصباح
في دنيا ضلمانة ودمار ...
نبرات حديثك يوم ترن
يا ستو بتقوم البيوت ..
ويومي اللي أسمع ضحكتك
يا ستو أتستف سكوت ..
وما أجملك يوم تضحكي
زي البنيات الصغااااار ...
كلمات حديثك ممتعه
تديني إحساس بالوطن ..
ياها الوحيده الرائعه
في كون مستف كلو ظن ..
صوتك أواخر الليل يمر
يمسح دواخلي من الحزن ..
يسكن دواخلي لمن تفج
شمس الله بتجيب النهار ....
كل المراد يا ستو يوم
ألقاكي جمبي وأحضنك ..
وإنجمه من بعد التعب
أمسك سبيبك وأدخلك ..
شان إنتي أحلي من الحياة
ويا ستو مافي اليشبهك ..
بتمني يوم ألقاكي شوق
أعبر مسامك وأدخلك
وأقعد قصاد قلبك هناك
في حته كلها إزدهار ....
صوتك ولقاكي الأمنية
والباقي كلو ده مامهم ..
عنواني في هادي البلاد
لا بالبطاقه ولا الإسم ..
عنواني واضح ياشباب
مختصرو في حبة نضم ..
معناهو في أربع حروف
سين السماح -
تاء التراب -
واو الودار-
وأنا بعشقك ستو الوطن
وغصبا" رضيت فصل الجنوب ..
ويوماتي أفتش في السماح
والدنيا نار وإنتي الودار ..
وأنا بعشق الوطن اليكون
مديني أفراحي الكتااااار .

صوتك ولقاك الأمنية والباقي كلو ده مامهم..

شلتك في حنايا الشوق
لقيتك جيتي في الخاطر ...
بتطلعي من مسام الريد
عشق في جووّك الماطر ...
وأكيد يبقي السكوت الطال
رضا وقبلانه للآخـر ...؛؛؛
تعالي نفج نخش قوووة
علي قلب الغرام ونشوف ...
منو الزرع الخيانة هناك
نمت في قلبو قايمه جروف ..
ومنو الحطم مشاعر ناس
بكت بي حرقه جوه الجوف ؟
تعالي وقولي ياساتر ...؛؛؛
رسمتك في دواخلي هنا
بنية بتشبه الغنـوات ..
بسل سيف الكلام عنك
عشان تتحقق الغايات ..
ولا بهتم إذا إتوفيـت
أقلو قليبي شانك مات
كره ها الدنيا فاتا عديل.؛؛
بتمرقي إنتي من صفحات
رواية بتحكي عن ستو ..
سطور مكتوبه بالدمعات
تراري وواضحه في الصوره ..
بتشرح في بنية وطن
رواية زوله عصفوره ..
مكسر ها الزمن جنحاتا
مابتطير ومكسوره ..
معسمه في وطن مجروح
برغم جراحا بتغــامر ...؛؛

ولابهتم كان من مت أقلو قليبي شانك مات..

تعالي وشوفي بي عينيك !
حال زولا" بلاكي خراب
هو منك وبرضو ساكن فيك ،،،،
خلاص مليت من الحاصل
علي الوطن الصبح مافيش ..
نباصر العيشه سترة حال
وكل منانا لقمة عيش ..
نجابد في النهار والليل
عشان لابده نحنا نعيش ..
نشوف وطن الجدود الحر
ونلبس جبة الدرويش
نطط بالفرح يازين
لما يغور نظام الجيش ،،،،
ويجي اليحكمنا زول إنسان -
يقدس حرمة الأوطـان -
نعيش في ها الوطن بأمان -
ولا زنزانة لا بوليس
ولا زول جوة بيتو تعيس
متين نلقاكا ياوطني
نضمك والقليب يشفي ؟
بعد ضلينا في غيابك
تلاتل ودردره ومنفي !
وعساكر تضرب البمبان
نسوا البيناتنا من عرفه !
شواطي ولا متل شطآن
ولا شفنالا يوم مرفأ !
حليل الطيب الإنسان
حليل الخوة والإلفه !
وطن شلناكا في عيونا
حلمنابك زمن تشفي !
وطن يمرض ولا بيموت
رقد جوة العناية زمن
رقد جوانا مستشفي !
بحبك ياوطن بالصح
وبرجاك لي أواخر الليل ..
متين تتحله من القيد
أشوفك وإنت زاهي جميل ..
تغور كل الدقون الفيك
تظل وطني البسند الحيل ..
أخير تتفكه من قيدك
وشن دار ترجي من زي ديل ؟
ورغم العسكر الفيكا
بتبكي وجارية عينيكا
وفيك بتضرب إسرائـيل ....

منوالزرع الخيانة هناك نمت في دواخلي جروف
منو الحطم مشاعرانسان ...؟؟

في عينيك عشم باكر
ما انت العمر كلو
والشمس الغشاهاغروب
وزغرودة بتزف للناس
زمان جديد مولود
بقيت غيرك يضيع اسمي
واكون انااي شئ مفقود
لقيني ياعشق جواي

يامشرع الحلم الفسيح!

شلتك في حنايا الشوق
لقيتك جيتي في الخاطر ...
بتطلعي من مسام الريد
عشق في جوك الماطر ...
وأكيد يبقي السكوت الطال
رضا وقبلانه للآخر ...؛؛؛
تعالي نفج نخش قوووة
علي قلب الغرام ونشوف ...
منو الزرع الخيانة هناك
نمت في قلبو قايمه جروف ..
ومنو الحطم مشاعر ناس
بكت بي حرقه جوه الجوف ؟
تعالي وقولي ياساتر ...؛؛؛
رسمتك في دواخلي هنا
بنية بتشبه الغنوات ..
بسل سيف الكلام عنك
عشان تتحقق الغايات ..

بيني بينك حاجه سامية
واضحه في الزمن الغمام ...
حاجه زي عمق الحقايق
لما يندسه الكـلام ...
بيني مابينك قصـائد
واضحه مقرية وتمـام ....
تتكتب في كل فجــه
يوم يحاصرني الكلام ... ؛؛
ستو والناس البسيطه
هم شرف هادي البلاد ...
وكل مافي ها البسيطه
بيندثر ويصبح رمـاد ...
يبقي ليه بنخون حبايب
أهدوا لينا حروف مداد
وياما شانا بكت عيونم
وفينا كم ضاقوا السهاد ...؛؛؟
المشاعر أحلي حاجه
لما بتكون بي صدق ...
ماتكون فيها الشوائب
مره واقفه علي الحلق ...

المشاعر أحلي حاجه
لما بتكون بي صدق ...
ماتكون فيها الشوائب
مُُُره واقفه علي الحلق ...
والإحاسيس تبقي واضحه
للحبيبه بتتنطق
ياكمان أحسن نوادع
أحلي سنوات العشق ...؛؛
نحنا يوم نعشق حبيبه
شرطنا الواحد عفيـفه ...
ماتكون إنسانة ساكت
ماشه بتسوي الفي كيفه ...
في الظروف المره تصبر
وفي المواجع ساله سيفه ..
تطرد الشك المعشعـش
في زماناتنا الأسيفـة ...
وكل ما الحال يمشي يعصر
هي الوحيده الكارمه ضيفه
ما الكرم بالمافي برضو
بتفرح الضيف الرغيفه ....؛؛
ربي تعدل حال بلدنا
وكل زول ينتم مناهو ..
وكل غلبان نلقي ضاحك
ويضحكوا الزيو ومعاهو ..
وعافية تسكن في جسدنا
وكل زول يعمر بناهـو ..
وأي زول مشتاق حبيبو
ربي سهل لي لقاهو ....
والبلاد تصبح رخيه
لا كلاب لا أمنجيه
لا دقون لا أرزقيه
ونحنا بنحل القضيـه
ترجع الفشقه وحلايب
والمحنة الفي القرايـب
وضمه يكفي الضاع وسايب
ما اللي ضاع ماهو الشويـه ...

واليقطعك
يصبح مدان


ياربي سهل لي الدروب


شان إنت علام الغيوب


وديني لي ست البلد


ياالواحد الفرد الصمد


أملاني من عندك يقين


يافالق النوي والجنين


ياخالق الحب والبشر


ياالمابيعصي عليك أمر


دايرأكون جمب ستو النفس


اناغيره فاقد كل حس


أرحمني يارب العباد


أديني من عندك عتاد


أرزقني بالخير والولاد


من ستو وأدخلني الجنان

طقــــت زغاريد في البلـد
ويارب تكون طقت لخير ؟
وإنشاء الله تبقي عشان فرح
وياما رجيناهم كتـير .....
يا ستو في هادي البلاد
الضحكه زاتا بقت عذاب !
زغروده بتخش البيوت
في ثانية تتقلب إكتئاب !
نحنا إرتضينا نموت كمد
ودعنا أحلام الشـباب ..
ولدونا في الزمن الغلط
في عنبر الدنيا الغياب ..
سمونا نحنا ولاد نعش
بنموت إذا نقط سحاب ....،،،
حلم المغنين الحـروف
تترصه في بيت الغنا ،،
وحلم التعابه الأمسيات
في دنيا ساهله وممكنة ،،
وأنا حلمي بي ستو اليقين
ألقاها وأقـدر أحضنا ،،
بعد إرتضيت صبر السنين
فيها الثواني متل سنه ،،
إتمني ألقاها وتكون
وأنا برضي بلقاها وأنا ،،
أنا ود بلد راضعه الحنين
وحتي البلد ياها أمـنا
والأم عطوفه علي الولد
طال ما الولد ياهو الجنا ......،،،
أنا ود بعانخي من الشمال
مولود في أرض المبدعين ..
حميد حسن سالم وكمان
كل الترابله المخلصــين ..
زارعين نخيلم في الضفاف
ساقنو من عرق الجبين .....،،،
أنا في النهاية آستو زول
خاتيكي للزمن اللي جاي ..
شان إنتي من دون الخلوق
لاقيت معاكي حلم صباي ..
إتمني ألقاكي وسريـع
في ثانية تبقي هنا ومعاي ..

قااااعد وأفكر كيف أجيكي
وإنتي أعلي من الثـريا ...
وياتو سكه تسوق خطايا
وتحمل الشوق اللي فيا ...
أنا إقتنعته علاقتي بيكي
زي علاقة كــــل بنيه
لما طــول الليل تساهر
تبكي من شوقا العليا .......¤¤
أنا زول متيم بيكي انتي
والمتيم بيكي طيبه ..
ماهو زي كل البيعشق
تلقي مدمن بالحبيبه ..
والحبيبه بتعني عندو
زوله جواهو وقريبه ..
ويوم تفارقو ثواني ساكت
تبقي وقعت كم مصيبه
والمصيبه أنا إني غيرك
مابساوي ولا السبيبه .......¤¤
ستو لازما" يوم أجيكي
حتي لو ميت عديييييل ..
شن بساوي بلا عينيكي
غير أعيش بائس ذليل ؟
نحنا لمتنا المشاعر
وبيني مابينك جميـل ..
ويكفي إنك فيني غنوة
وحجوة زي عضمة شليل ..
زارعه جواي المحاسن
وشايله مني حمل تقيل .......¤¤
يوم أجيكي بجيكي باكي
أفردي الأحضان عشاني ..
ماتكوني بخيله ستو
أنا ياما أديتك حناني ..
وياما فيكي مليت دفاتر
طاعمه مازي الأغاني ..
ما الأغاني بقت مسيخه
مارقه من بق الثواني
بي حروف مرصوصه ساكت
لا تعابـير لا معـاني ......¤¤

المصيبه إني غيرك مابساوي ولا السبيبه..ابداع ياوليد والله يخلي ستو

يجهرن عين السماحة.........ويشرقن اعيادعليّه
ديل عيونك حكمة الله.....صاغن احساسات وضيّة
يدهشن كل البشوفن......ويلهبن احشاهو غيّ
شكرا شجون

التعديل حيرني يا كردي؟

شجون كتب:

التعديل حيرني يا كردي؟

دي حاجات بسيطة
واسف جداعلي الخطأ الغير مقصود
تم التعديل

والله يا ستو إشتهيت
الرقده في حجرك هناك ..
وكم مرة إتمنيت أكـون
زولا" يحقق مشتهاك ..
عارفك كمان مشتاقه لي
وأنا زاتي مشتاق لي لقاك ..
إلآ الزمن حالف يمين
لازم أموت وأنا في رجاك ..¤¤
يا ستو ياما في ناس كتار
لسع يعانوا من الحبيب ..
ماشفتي كيف يا ستو ناس
ريدم صبح الم القليب ؟
والشك دخل. سكن الفؤاد
ساعة الحبيب بقي ماحبيب ؟
وأنا وإنتي أحسن من كتار
والبينا أصفي من الحليب ... ¤¤
ياربي تديني الصبـر
وأديني من عندك يقين ..
وأجمعني بي ستو الأمان
داويني من وجع السنين ..
أنا زول بقيت في ها الحياة
غير ستو ماعاد لي حنين
وياها الوحيده المن زمان
غطيها ربي من أي عيـن ...¤¤
وأعدل كمان حال أي زول
قاعد يعاني من الهيام ..
وداوي القلوب النازفه من
وجع المسمـنو الغرام ..
وطيب خواطر العاشقين
في دنيا غرقت في الحطام
وأعدل كمان حال الوطن
خلينا ننعم بالسـلام ¤¤¤

زوله بتخنقك بالشوق
تكتف وتمسك أنفاسك ..
تخشك زي نسيم الريف
وترقد جوة إحساسك ..
بنية تنور الوجـدان
وكت ما الدنيا تتماسك ..
يهدك نضمها الموزون
تجوط الدنيا في راسك .. .. ..
تعالي وفرتقي الإحساس
ولخبطي كل حساباتي ..
تعالي وخشي في جواي
وأعبري من مسامـاتي ..
رسمتك فيني قبل ألقاك
تفاصيل من معــاناتي ..
لأنك إنتي في الآخـر
تبشري بي فرح آتـي .. .. .. ..
إذا ما الدنيا لـمتنا
تكون مشكوره ها الأقدار ..
أقلو نحقق أحلامـنا
ونكمل سـكة المشـوار ..
ونبقي برانا في دنيا
ولا بيناتنا يـوم أسـرار .. .. ..
نشيل أنا وإنتي باقي الهم
وماننسي الوطن في يوم ...
ومانقعد برانا نقـول
إنشاء الله القيامه تقـوم ..
يهمنا حال وطن مجروح
غلابه وحدها الخرطوم ..
ويتامه يساهروا طول الليل
عيونم ماغشـــاها النوم ..
نكفكف دمعة الأمات
نبشر بي سنين جايات
بنياتنا الدوام سمحات
ينططوا يجروا طول اليوم .. .. ..
وتكوني آ ستو بشري وفال
وتمسحي دمعة الاطفـال
أعيش في حضنك الدافي
ملان بالصحه والعافي
تضمنا نحنا حضنة شوق
إذا هجمت علينا أهـوال .......