استعجلي وخشي القليب

تذكير بمساهمة فاتح الموضوع :

بتنفسك في الضيق شهيق يا أحلي من طعم التمر
يامالية قلبي حروف يقين من الصباح واليوم يمر
نشوان بكون في حضرتك وإتهنأ بيك طول العمر
يابت رقيقه كما الزهور نديانة والحال فيك يسر
ما أجملك والله جد لمن خطاكي تجيني من بعد العصر
وعند المغيرب توصلي تلقيني مت من الصبر
صبري العليك ماصابرو زول صبر السيوف في يوم بدر
أصحابه شادين القتال دايرين من المولي الأجر
تسمع صليلا وري الجبال تحلف تقول يا الله كر
إستعجلي وخشي القليب أناحالي دونك أصلو مر
مافيهو حتي طعم حياة ومن غير عيونك مابيسر .

إتدفقي وكبي المشاعر
في الشـوارع والبيوت ..
وأنا حا أظل أنده عليك
شان تمرقـي !
وتخشي في بيت كل زول
أدمن كلامـك والسكوت ..
وماتدخلي غير جوه في
بيت الغلابه المتعبين -
غرف اليتامه الدامعين -
أجمل مكان يا ستو ده
لا بتلقي ضجه ولافي صوت ..
وأنا في إنتظار حضرة مجيك
متمدي مليااااان بالحضور ..
وفاردلك الأحضان وطن
بالرغم مابي من فتور ..
وراجيكي يا آخر نجاه
تبني الكباري علي الجسور ..
وتقوم مدن عالية وقصـور ..
تحضن أراضيـنا البذور ..
تسكن شديراتنا الطـيور ..
لا بندقية ولا زخيره ولا صقور ..
وشن دايره تاني وشن بدور ؟؟
يا أنثي بي كل الحضور ..
يابت تعلمنا الصبر ومعني الثبور ..
يازوله مابتعرف تلف فينا وتدور ..
كده ده الوطن !
العاجبو عاجبو بلا محـن !
والمابيعجبو ده ما وطن !
ي ستو حضنك هو السكن
وأجمل كتيـر ..
من كل حاجه بلا عمار
أجمل ديار والفيها خير ..
نيمه وتُكل أوضه وحويش
نسمه وتمر بعد الهجير ..
وكيف حلوه ياهادي الحياة
وكيف طاعمه ياموية الحفير ..
مافيش فريزر إلأ زير ..
لقمه وبتنزل في البطون
فرحة جنانا الدااب صغير ..
يا ستو بالجد إنتي خير
والجايي بعدك كلو خير

يا حبيبة إذا إفترضنا
إني مته عليكي شوق !
إيه حتعملي بي ورايا
إذا الشمس أبت الشروق ؟
وليلك الممتدي طوول
وقلبك إتأذي بالحروق ؟
ودنيتك صارت تعاكسك
ماشه تنزل وإنتي فوق ؟
ما أظن حتموتي زيي
وأنا العوير كاتلني شوق
لي زمن وأنا أهاتي بيكي
ولا بتجاوبي ولا في رد ..
والعمر فاايت مروح
والسنين عديتا عد ..
والليالي كتيير تكاجر
والضغوط ماليها حد ..
وحتي أحلامي المعاكي
راجية تنتظر المدد
ستو لو بتخافي ربك
أبقي حني علي شويه ..
يكفي إني هويت عيونك
في وطـــن مليان أسية ..
وفي بلد بالوحشه تكتل
لا بترحم لا في نيه ..
وكل زول سايب مشاعرو
وجاري عندو أظن قضية ..
والقضية حلولا مااافي
ما الحكومات كيف غبية ..
وخاصة حاكومة بلدنا
بي كلابا الأرزقيه ..
يبقي شن فايدة هوانا
إذا أعيش مشحون أذية ؟؟

ياحبيبه اذا افترضنا اني مت وراك شوق أيه حتعملي بي وراي؟
عليك ماكتيرةالسنين اللعدو..ولاباقي عمرا يضيع في رجاك
وراك شن بدور بالسنين الممله؟
كما الامسيات لماتظلم تشتاق للأهلة

بتنفسك نسمه فرح وكتين يضيق صدر الهموم
وتحسسك رعشه ودعاش ومطر رزار سايق الغيوم
واتخيلك أجمل حلم صابح هواي وكتين انوم
بتوجك خاطري الولوف يتوسدك ريدا يدوم
وبلسمك روعه هواي مكسية بي حدق العيون
واهديها ليك يابلسم جروحي
لحظه فرح تتشابا لي زولا حنون
واقفل عليك باب الجفون واسكن هواك باقي العمر
لا بمرقك ولا ليك بخون يا انتي ياحبي الحنون

حلم الجعان العيش
وأنا حلمي شوفتك بس ..
والباقي كلو يهون
مادام بحسك حس ..
وإحساسي بيكي أصيل
يكفيكي فيني نفس ..
ويكفيني إنك لي
كل الشعـور والحس
يا ستو نحنا إتنين
خلقونا شان مانريد ..
وأنا ريدي ليكي إحساس
يوماتي ماشي يزيد ..
وشوقا" كتلني عليك
سايبني أبكي شديد ..
وأزرف دموم من دم
زي أم جناها شهيد
أنا بيكي جد فرحان
والفرحه كاتلاني ..
وداير أشوفك بـس
وآآخدك في أحضاني ..
وإندسه في عينيك
وأهرب من أحزاني
في دنيا ورديه -
أحلاما دغريه -
والبيني بين عينك
زي فرحه عيديه -
وكان بس منايا أجيك
بس حالتي سجماني
يا ستو لازم أشوف
حضرة عويناتك ..
وأحضن أنامل إيديك
وتسعدني بسماتك ..
ولو الله قدر وراد
يجمعني بي زاتك ..
يبقي المحال إنتم
وجمعتني جناتك ..

يامشرع الحلم الفسيح
أنا بيني مابينك جزر
تترامي والقول اللديح
القدرة والزاد الشحيح
كملتو ماكمل الصبر
نتلاقي في الزمن المديح
ميعادنا في وش الفجر
،،، ،،،، ،،،
يامشرع الحلم الفسيح
يابعض مني وفيني ساكن
أنا أصلي منك ومشتهيك
وبيناتنا ليل الغربه داااكن
هبت هبوبك -
أفتح شبابيك المساكن
وسع دروبك -
ولع مصابيح الأماكن
،،، ،،، ،،،
يامشرع الحلم الفسيـــح
يومنا النهب أسلبنا خوفنا
كبرنا قدرك مرتين
وطول قدر كتفك كتوفنا
ياغضبة الرعد البيسكـن
في غناوينا وحروفنا
ضوي الدساكر والضفاف
عبي الحناجر بالهتاف
سدد مسامات الرعاف
ستو مغاراتنا وكهوفنا
،،، ،،، ،،،
يامشرع الحلم الفسيح
أنا وإنت والمطر الفصيح
حنطوع الزمن القبيح
ناخد بعض شكل السما
حدثني دايما" كلما
تنشف علي البر الضفادع
يهجر الضو المواضع
تسقط من الكف الأصابع
حدثني دايما" كلما
تحرد مراسيك السفـن
تسكن مرافيك
الزعامات الدمي
حدثني لو تاهت خطانا
علي الدروب المبهمه
أو ربما !
تهدم آلآت الشوارع
وترجم العزي الصواقع
حدثني لو صادف
الكي المواجع
وضلك علي الساحل رمي
حدثني لو مطرك هما
علمنا دايما" كلما
نبذر علي أرضك شهيد
تطلع شمس تبهر
بأنـوارا السما

أفتقدتك في المواجع
لما ياااما نزفته دم ..
وكنت فاكرك يا الحنينـه
زوله بتزيلي الألـــم ..
إلآ آآآآآه بعد المسافه
وإنقطاع حبل العشم ..
وحرقة الزول لما يدفع
من عميرو سنين ندم ،،،
ستو دمعات الغلابه
يوم تفيض تغرق مدينة ..
مارقه بي حرقه ولهيبا
يحرق الدنيا اللعينـة ..
أنا ود غلابه آستو مارق
من بطن ظلت أمينة ..
ومابتلد غير الأغاني
وكلمة القول الرصينة ،،،
الوجع يا ستو عندي
حاجة زي طعم التمر ..
مره بتمططق طعيمـو
وفي الحلق ينزل يمر ..
ومره يحرق لي لهاتي
وفي لساني بحسو مر ..
وعادي عندي وجع قليبي
أنا أصلي مخلوط بالجمر ..
والجمر يآذي الوطاهو
وياما حررق ومنو كُر ،،،
أنا عشته شان خاطر عيونك
أحلي سنوات الغرام ..
وديمه بحلم بي لقاكي
وأهدي ليك أجمل كلام ..
وعارفك إنتي أصيله داايما"
ومارقة بتفجي الغمام ..
وسايقه لي وطنك بشاير
ورافعه إيدك للسلام .

مشكووور على الابداع لك التحيةولاتحرمنا من قلمك الراقــــــــى

صلاح على خليفة كتب:

مشكووور على الابداع لك التحيةولاتحرمنا من قلمك الراقــــــــى

تسلم ياراقي

شديت رحالي عشان أجيك
فاجأني مشوار سكـتك ..
وهداني في بعدك شعور
وإحساس غريب بي دنيتك ..
وعرفته نفسي بلاك بقيـت
إنسان بيفقد طلتك ..
وأيقنته إني بكون معاك
مرتااااح كتيـر في حضرتك .،،
يا ستو مشوار الكلام
دايما" بدايتو حرف ألف ..
بالعكس مشوار الغرام
بتكون بدايتو إحساس ولف ..
وأنا بعشقك وبهاتي بيك
ياستو ريقي عدييل نشف ..
وماسك دروب عشقك تراي
ماشيها دغري وما بلف.،،
ههه ضحكني عشقك ياملاك
وقطع مصاريني البعاد ..
قايلاني بتحمل جفاك
أنا وحدي من دوون العباد ..
وآآشري ياستوإتكويت
حرقني رمضك والرماد ..
وعذبني في بعدك شقاي
حالي العلي حال السواد .،،
كل الأماني تكوني لي
وأقدر ألبسـك الزفاف ..
لكني مهدوود بالفراق
شايلاني أحلامي الضعاااف ..
كاتلاني سكين فرقتك
ياستو شارقني الرعاف ..
وإشواقي ليك دايما" توت
وإحساسي عاميهو النشاف ..،،

انتم هكذا الشعراء تنتقلون بنا من احساس الي إحساس ولكن؟

شجون كتب:

انتم هكذا الشعراء تنتقلون بنا من احساس الي إحساس ولكن؟

ولكن يقدر الله ما يشاء
تحياتي شجون

بانت ووضحت فكـرة إنك
طفله بتسكني في الوجدان ..
وتزرعي نخلة شوقك وحدك
وتحصدي حنك في الإنسان ..
يا ستوهادي الدنيا دي أصلا"
لا مضمونة ولا في أمان ..
وأغرب حاجه كمان يابنيه
اليحصلك في السـودان ..
ولمن تكبري وحدك شوفي
كيف تتنكر ها الأوطان ..
وكيف تستسلم للحكموها
وضوقي برااك مر الكيزان .،
أنا لو منك كنت قعدته
ومابمرق شان ألقي الناس ..
ما البني آدم أصبح يكتل
ينهب ويسرق دون إحـساس ..
لا في ضمير لا حبة رحمه
وحتي الريد ماعندو أساس ..
ولو حبيتي تكتلك مغصه
من راجلا" مقطوع الــراس ..
في البتسطل ويشرب خمره
وفي البيزور حتــي المـاس.،
ربنا يستر ياستوته
من مستقبل ماشي عليك ..
ربي يعينك إنتي وستو
ويحفظ قلبك وشوق عينيك ..
وأنا عن نفسي أبوكي وخالك
وما حا أقصر أبدا" فيك ..
إنتي يتيمه وعايشه معايا
ومابتعب شان أشقي وأجيك ..
وكل مناي ألقاكي هنية
تضكي جمبي وألعب فيك .

هلت بشاراتك خلاص
من قبلتك شـال البرق ..
ورغما" عن الحاصل علي
وبالرغم من قلبي الحرق ..
لازلت منتظرك حروف
بي كل لغاتي بتتنطـق ،،
يا ستو فاتت كم سنه
من عمري عمرك والزمان ..؟
أنا غايتو عديت السنيـن
العشتهن سااكت هوان ..
إيقنته إنو الفات كتير
لا ريده لا حب لا حنان ..
وأنا عمري فاااات
وصبح رفـات
وشبع شتات
سنواتي ضاعت من زماان ،، ،،
شرقت شموس عاما" جديد
والناس بتحلم بالعديل ..
محتفله بين ضو الشموع
وأنا دمعي يتصابق يسيل ..
حزنا" علي وطني اللي ضاع
وناسا" تنوح كل ليل ..
يا ستو بتمناك يقين
صبرا" ممدد ولي يشيل ..
يحملني من حزني العـلي
يبقالي راكوبه وضليل ،،،

سنة سعيده علي الجميع
وكل عام وأنتم بخــــير،،،،،،،، -

وصحيت علي ضي الصباح بتأملك
وسرحته في عينيك كتـير ..
يا زوله جارية علي العـروق
مستوطنة القـلب الكبير ..
ما أجملك وإنتي الصباح
يابت صباحك كلو نور ..
بهواكي بالبي من شعور
بي كل مشاعـري وبي ضمير ..
وما ظني غيرك ببقي حي
شان إنتي وحدك زوله غير ،،،،
خفي الخطي وإستعجلي
يكفينا كل الفات ورااااح ..
أنا زول مستف بالهموم
مليت من الأسي والجراح ..
دافرني ليك إحساس جميـل
زغروده في الزمن الجراح ..
وحبة مشاعر سايبه ساااي
خايف تضيع وسط الرياح ..
ومانلقي نجمعا من جديد
يا ستو حايضع السماح ،،،،،
إستعجلي وأنوي المروق
لاقيني في زمنا" جميل ..
خلينا نمشي نفوت بعيد
نرتاح ونفرح كل ليل ..
يكفي اللي ضاع ساكت سـدي
وعمراً قضيتو معاك رحيل ..
تكفيني وجعات الغرام
شيلني زي ماليك بشيل ..
ضميني في حضنك سلام
كل ماعيوني بدت تسيل ..

ما اظني غيرك ببقي حي..

وصحيت علي ضي الصباح بتأملك
وسرحته في عينيك كتـير ..
يا زوله جارية علي العـروق
مستوطنة القـلب الكبير ..
ما أجملك وإنتي الصباح
يابت صباحك كلو خير ..

أكتـر حاجة بحبها فيكي
طيبة قلبك وشوقك ليا ..
والعاجبني كمان يا ستو
إنك ديمه قصاد عــينيا ..
ومابتتحركي من قدامي ..
وديمه بشوفك من حوليا ..
وكل ما الدنيا تضيق قدامي
يبدأ يزيد إحساسك بيا ..
ويظهر عطفك في عينيكي
وبرضو كمان بتخافي عليا ..
؛ ؛ ؛ ؛ ؛؛؛ ؛ ؛ ؛ ؛ ؛؛؛
هادي البلد الفاقده اليعجب
مافي بلاك يا ستوعجبني ..
وحبك رغم غلاتو وقيمتو
ياما كتير بوراك عذبني ..
وأصلا" وطني كمان يا ستو
ضربو بيوجع وكم ألمني ..
ولو ما ربـنا ساتر حالي
كنت سعيت للموت طوالي
وعيشة الدنيا دي مابتلزمني ..
؛ ؛ ؛ ؛ ؛؛؛ ؛ ؛ ؛ ؛ ؛؛
ستو كفاي الغيبـه تعالي
داير حضنك قبل أموت ..
حقو تخفي خطاكي عشاني
ونادي عليا بآآآخر صوت ..
أنا قررته أحبك وحدك
وكل مناي يا ستو بيوت
تقدر تعرف قيـمه ريدنا
ومامحتاج البينا ثبوت ..
؛ ؛ ؛ ؛ ؛؛؛ ؛ ؛ ؛ ؛ ؛؛؛
ريدك أصبح جاري في دمي
وقاعد واضح ظاهر وباين ..
وأي إنسان ماشاف ريدنا
ماظنيتو بشوف ويعـاين ..
نحنا البينا موده ورحمه
وبحر الشوق راكبنو سفاين ..
وعهد الريد انا حافظ بندو
والبيموت بالشوق مو خاين ..

؟؟؟؟

اتفضلى اذنك معاااااك هدى المسامات وادخلى ,,,,,,

أنا من زمااان راجيك تجي
وتندسي في حضني الوسيع ..
وياما كتير ناديت عليك
عارفاني من غيرك بضيع ..
ويمكن بلاكي أموت عديل
وينزف كمان قلبي الوجيع ..
ما الدنيا من غيرك ضياع
خبي وتعالي سريع سريع
متعودك في كل صباح
إندفي في حضنك برااااي ..
يازولة طااااعمه كما التمور
يافرحي ياسعدي وهناي ..
أهديتك الكلمات قصيد
مارقات حروفك من شقاي ..
والدنيا غيرك مابتكون
غير حاجه بتزيد في أساي ؛
يا ستو وين شفتيها يوم
دمعات بتتقطر جمر .. ؟
تحرق خدودي حريق فظيع
زي نخله ماشالت تمر ..
وين شفتي يا ستو السنين
تحلف يمين يوم ماتمر .. ؟
وتحرن ثواني الروح تقيـف
والحال بلاكي ولا بيسر ..
والكون طشاش ،، وطني اللي عاش ،،
راجي الرشاش ،، مطر الدعاش ؛؛
وأنا فيني ما كمل العمر؛؛؛
ياوطن أفتح شوارعك لمـنا
علمنا كيف يبقي الجهاد ..
درسنا مامعني الجحود
وأنا بيني مابينك وداد ..
حبة مشاعر مابتموت
مطلية بي لون السواد ..
وقلبا" يشيل شوقك رحيل
حايمبو ياما بلاد بلاد ..
فرحان عشان عشقك نبيل
باقيلو طوووول الرحله زاد؛؛
خليك وطن ما أظن يخاف
لا من عساكر لا دقون ..
ريحنا من زمنا" رعاف
دايما" مبكيلنا العيون ..
أنقذنا من حافه ضياع
من ناس تعيش عيشة ضباع
لا ليها ريحة ولا في لون ..
خليكا كون أو لا تكون
حسره ودموع !
أبقالنا عون ماتبقي جوع !
خليك رحيم زي اليسوع !
شبهك محمد في الركوع !
وطني البراح الكيف سمح
وطني المحال في يوم يهون ؛

أنا عن نفسي بحبـك جدا"
شاوري قليبك وردي علي ..
ومابستحمل تسكتي إنتي
أرفعي إيـدك وأشري لي ..
أنا ناديتك بدري تعالي
شان أحكيلك حالي البي ..
وكيف في بعدك إتعذبتـه
وياما وراك سالن عيني ،،،،
أنا حبيتك لما لقيتك
زوله حنية رقيقه وسمحه ..
بت تستاهل أفرح بيها
لونا بيشبه لون القمحه ..
وفاتحه أحضانا تنادي تعال
خش يازول بي ألف رجال
إنت بتكفي وساتر الحال
مقنع حوبة وطعم الفـال
وأنا في إيدك زي السبحه ،،
ما أترددته أخش في حضنك
ياهو ملاذي وأحلي مكان ..
ليا سنين وأنا كايس ليهـو
ومالاقيت في غيرو أمان ..
وكنته مشتت في أفكاري
لما عديل ضاق بي السودان ..
والإنسان محتاح لي قعده
فيها يراجع نفسو كمان !
ويقعد يحسب في سنواتو
ويحسب برضو الناس الماتو
شان يستعدل باقي حياتو
ويعرف إيه معني الإنسان ..؟

انا عن نفسي بحبك جدا ..

محتار شديد أنا ياقلب
في حضرة المدعو الغرام !
والحيره في كونك تضح
دم العشق علي مااااايرام ..
نان مابتشوف
زمن الكسوف

محتار شديد أنا ياقلب
في حضرة المدعو الغرام !
والحيره في كونك تضح
دم العشق علي مااااايرام ..
نان مابتشوف
زمن الكسوف
الكلو خوف والحب حرام ؟
ضاخي الدموم بي كل قواك
شان ريدة بتموت كل عام ..
والحكمة في إنك رقيق
زي رقة أصوات الحمام ..
وحيجيك يوم تقـعد تئـن
من وجعة الزمن الزكام ؛؛
أنا غايتو إحساس الحياة
شيعتو بدري حليلو مات ..
والباقي جواي من شعور
ييدااك رحل ودعني فااات ..
ورغم الحروف الحلوة ديك
مابتطرب إحساسي أغنيـات ..
وكل المساعي عشان أريد
يوم جاتني بي كل الجهات
رجعت تجر خيبة رجاي
وإتقطعت بينا الصلات ؛؛؛
سبحانو هو رب العباد
يومو الأمر نصل الرحم ..
سبحانو هو خالق الوجود
المابيقول الشر يعم ..
سبحانو هو رازق الخلوق
بالعيشة نحنا ولا بنهم ..
الكيف رحيم وعطوف كمان
المابيطيعو أكيد ندم ..
وأنا خوفي ليك يا المابتخاف
يوماتي ترتكب الإثم ..
تتمادي في فعل الذنوب
أحسن تتوب
قبال تحين ساعة الرجم ؛

شان ريدة بتموت كل عام..
تري هل الحب بموت؟

هي الزهور في نضارتها تموت لتحيا من جديد

شديت رحال الشوق خلاص
ناوي السفر لي أحلي زول ..
متحدي عقبات الطريق
مهما الدرب يمتد يطول ..
جاييكي بالبي من حنين
لو داير أوصفو شن أقول ؟
وإنتي الكلام عندك وقف
والجايي بعدك ماهو قول ..
يازولة بتشد الحروف
وأنا فيكي خوفني الذهول ! !
¤ ¤ ¤ ¤¤¤ ¤¤¤
حاولته أغنيك بيت قصيد
خذلتني فيكي حروف غناي ..
كيف أوصفك وإنتي الجمال
كاسيكي زي نجمة سماي ..
بس يات حروف تقدر عليك
أنا عندي فيكي حديث وراي ..
إنتي القمر
إنتي النخيل
ياكي البحر
أمواج ونيل
سكة وسفـر
إنتي الرحيل
وأنا بوصلك يامبتدايا ومنتهاي ..
¤ ¤ ¤ ¤ ¤ ¤ ¤ ¤
يازولة جاية مع الخريف
زيك ولا شبه السحاب ..
شبوره نازلة محال تقيف
جات شان تفتح أي باب ..
تدخل علينا وماها ضيف
لابسة الأماني كما النقاب ..
جات شان توقف ها النزيف
تطربنا بي سمع الرباب ..
جات ستو وإحساسا الرهيف
دي التلفت إحساس أي شاب ..
بالرقة والقلب النضيـف
ووآآآحسرة الماشافا غاب ..

الله!
وكت يتعلق قلبك بي زول
والزول عن حبك مشغول
تلتاع ولياليكاتطول ..علي قدرهواك مايتمدد قدامو عزول
فوق سكتو حيلك ينهد لاتقرب لاتلقي وصول

بلسم كتب:

الله!
وكت يتعلق قلبك بي زول
والزول عن حبك مشغول
تلتاع ولياليكاتطول ..علي قدرهواك مايتمدد قدامو عزول
فوق سكتو حيلك ينهد لاتقرب لاتلقي وصول

اتسرﺑﻴﻨﻲ ﺣﻨﻴﻦ ﻭﺷﻮﻕ
ﻭﺇﻧﺪﺳﻲ ﻓﻲ ﺟﻮﺍﻱ ﻗﺼﻴﺪ...
ﺃﺣﻤﻴﻨﻲ ﻣﻦ ﻏﺪﺭ ﺍﻟﺰﻣﺎﻥ
ﺃﻣﻠﻴﻨﻲ ﺑﺎﻟﻮﻓﺎ ﻣﻦ ﺟﺪﻳﺪ...
ﺃﻧﺎ ﺯﻭﻝ ﺑﺴﻴﻂ ﻓﻲ ﻛﻞ ﺷﻲ
و ﻋﻴﻨﻴﻜﻲ ﻏﺎﺍﺍﺍﻳﺔ ﻣﺎ ﺃﺭﻳﺪ...
ﻭﺍﻟﻄﺎﻟﺒﻮ ﻣﻨﻚ ﻣﺎﻛﺘﻴﺮ ﺣﺒﺔ
ﻋﺸﻖ ﻭﺣﻀﻨﺎ"ﺷﺪﻳﺪ...
ﻭﺍﻟﺒﺎﻗﻲ ﻛﻠﻮ ﻭﻻﺑﻴﻬﻢ ﻣﺎﻃﺎﻻ
ﺟﺎﺭﻳﺔ ﻋﻠﻲ ﺍﻟﻮﺭﻳﺪ

زيك هـــو وين
وريني ياقمر الزمان ؟
إنتي الوحيده البوعدك
في قلبي بضمنلك مكان
تمليهو من عندك يقين
وأنا ضامنو بديكي الأمان
ويبادلك الوفا بالشعـور
دايما" مغطيك بالحنان
ولو دايره تشعري بالدفئ
ضميهو بي بالأحضان كمان !
=¤ =¤=¤= ¤=
أنا زي جمالك مارأيـت
يا ستو في كل البلد
وإحساسي بيك إنك ملاك
زيك محال يبقي إتولد
يامنتهي العشق الحنون
يامشتهي الروح والجسد
ياطاعمه في كل الفصـول
أديني من عندك مدد
يحميني ويلات الظروف
أنا كلي خوف مليااان نكد
وشان إنتي قدمتي السبـت
جاء اليوم عشان تلقي الأحد
وماظني بخلفلك وعود
أنا برضو رااجل وود بلد
=¤= =¤= =¤=
يا ستوعيشة الناس ظروف
وأنا ظرفي بايخ وضمه شين
خجلان أقولو الناس تشـوف
قلبي البيرجف من متين
لو ماشة كان دنيتنا صاح
أنا كنت جيتك مرتين
الأولي شان أقعد معاك
وإتهني بي قربك سنين
والتانية تبقي عشان كمان
أطلب إيديكي عديل وزين
=¤= =¤= =¤=
ما أحلي دنيا تكون معاك
أنا وإنتي ضامينا المبيت
وما أجمل العمر اليكون
عنوان عريض لي أحلي بيـت
بيت هااادي مازي البيوت
نفرحبـو زي العنكبوت
يوم يبني بيتو نسيجو خيت
=¤= =¤= =¤=
والدنيا تحلي ومن جديد
يدخل بيوتاتنا الخريف
وتتفتح الغرف الزمااااان
كانت تضم الجايي ضيـف
وأملاكي بالعشق الحلال
من جوه إحساسي الرهــيف
نمرق نخش كل البـيوت
لا دمعة لا حالاً أسيف
بهواك عشق بهـواك وداد
بهواك شتا بهواكي صيف
يازولة في الأحضان تعيش
رغماً عن الواقع المخيف

كل ماتضيق هادي البلاد
تعصرني آلآآآآف الهموم
تنزف جراحي ولا بتقيف
مليت خلاص ريحة الدموم
وما أبشع الحال يوم يكون
من تصحي تشعر بالسموم
وريح العوارض قررربت
كل ما يفوت في العمر يوم
إشمعنا بس هادي البلاد
دايما" تساهر ومابتنوم ؟
بتشيل هموم آخر الزمان
لي شعب حالو ولا بيـدوم
شعبا" ولا هاميهو شـي
غير يصحي من تاني وينوم
ما أروعك يادي البلاد
انتي الجعانة ودار تصوم
*************
بشكيـكا يا البتقود بلد
كانت زمان بلد السرور
من خيرا كان تدي وتجود
أجواده حتي علي الطيور
والناس نشيطه نشاط شديد
مابتعرف النوم والفتـور
بس هسه تنشط شان شنـو
وبيناتا والخوف مافي سـور ؟
والعيشة مره مرار عجيب
ضلمانة ضمـه ولافي نور
والبهجه فارقت النفوس
لا ضحكة تمرق من عروس
والحيره في الوش العبوس
والناس بتتخابت تكووووس
زي مابتلف الدنيا بيناتنا وتدور
****************
أنا نفسي أضحك مره بس
والضحكة تمرق بي صدق
إلآ الهموم والـحسره دي
شوكة وتقد نص الحلق
حاولته أعيد بيت الغـــرام
لي ستو من طين الصدق
لكنو إتهدم سـريع
في لجة الأحزان غـرق
وخيرني فيهو زمن شقاي
وأحسن كتير من يتحرق
شان الحريقة مع الرياح
تلقاها كل ماتموت تبق

شان إنتي قدمتي السبت جا اليوم عشان تلقي الأحد..
وما اظني بخلفك وعد

بحسك في القلب خفقان
تضخي حكاوي كيف سمحه ..
وأنا المجروح بحد الشوق
أعاني التوهة والسرحه ..
وكت ما حمته كايس ليك
وسط كل الكـلام مدحـه ..
حروف تمدح نبينا سلام
إيدين غرقاانة في السبحه ..
تسبح بالنهار والليل
تجر تنتق صبرنا طويل
تنسينا العذاب والويل
ويبقي صبرنا كلو جميل
علي مرض الزمن بالحيل
سحائي وسرطنه وقرحه ¤
أنا الراجيكي تشرحي لي
أعيش أنا شان أحبك كيف ؟
وياتو إحساس فضل جواي
وحتي إحساسي شايفو كفيف ؟
أحبك كيف إذا ما كان
بعيش في حضرة السودان
معاناة وجهجهة وتخويف ؟
بتحكمنا الحكومة ضراع
بنتعب شان نلاقي رغيف ؟
نظام ماخلا لينا مجال
وكل العيشة صعبه محال
وكل الباقي شان يتقال
حروف ممنوعة أي سؤال
وإن مرقت تلاقي السيف ¤
أحبك بي طريقتي برااي
طريقة تجابد المعقول ..
طريقة تفتتتح الأبواب
وباب الريده مامقفول ..
وكل إنسان مصيرو يريد
فكيف نمع مشاعر زول ؟
من حق الحبيب يشتاق
كمان حق الحبيبة تطول ..
صحيح إنو الوطن شقيااان
مطيرتو بترفض أي نزول ..
وواضعة شروط عشان تنزل
ترش أرض المحبه حقول ..
شروط قااااسية ~
وكالآتي :-
تغور حاكومة الإنقاذ
إذا بتقول علينا شذاذ
وتمرق من بلدنا الجاز
دي لاها فلاحة لا إنجاز
وإصلا" في الأرض بترول ..
بعد داك المطر بتصب
وينزل خيرا في الوادي
وأحبك ستو بي صحي
وأحبك إنتي يابلادي
لا عشراقة لا تقحي
نصيحة وماشة تزدادي
زيادتك بالعرض والطول ..

ورجعته جيت
لي زوله تستاهل غناي ..
ياها الوحيده الردتها
ومتمني يتحقق رجاي ..
إنسانة أدتني الكتير
شالت معاي أحلام صباي ..
وأنا برضي مديها الأمان
متمني لو تفضل معـاي ..
يمكن أقلا أعيـش سعيد
ترحل همومي وكل أساي ...
يا ستو جيتك وكلي شوق
داير الأماني نحققـه ..
ومتمني لو ألقاكي زي
شمس الله نايره ومشرقه ..
هداني في بعدك رحيل
قضيت عميري مساسقه ..
مابين جروفك والنخيل
وبين الرمال المحرقه ..
وتعبته من هادي الـجروح
يوماتي ماشه مفتقه ..
وصبري الصبرتو ولا الخليل
يقدر يدوس جمر اللقا ...
أرجيني جيتك وما بضيق
للعوده وأرجع من جديد ..
فارقته ناسي عشان لقاك
يا ستو غيرك مااااافي عيد ..
وكل الفرح غيرك بكون
ناقص ولا فيهو الجديد ..
وأنا شلته وردات فرحتك
وسقيتا من دمع الخديد ..
ودايماً ورد موية الدموع
ينشاف مفرهد من بعيد ..

دموع بتقطع الأكباد
تهد حيل الجبال الشم ..
ده ما الخد الشبه دمعات
ودي ما العين البتنزف دم ..
إذا سالن عيونك ديل
يكون حطمتي أي عشم ..
وأنا العشمان أشوف نورك
ولي كل الجروح بلسـم ..
لقيت إنو الزمن ضاق بيك
وقلبك ياااااما ضاق الهـم ¤¤
تعالي آستو نتقابل
أقلو تقيف دموعك ديل ..
نعيش باقي العمر أفراح
نودع كل زمان الويل ..
تكوني حبيبه دغرية
وأكونلك زي جمال الشيل ..
كفاية نواحك الشفتو
ودموعك جارية زي السيل ..
طبيعي تعيشي زي الناس
تفتشي في الصحاري ضليل ¤¤
بلادك مابي ينزل خيرا
يبست فوقا دنيا الناس ..
وفات زمن البشاشة زماان
ومات الطيب الحساس ..
بلد تقبل تنوم حزنانة
ويقطع في حشاهاالفاس ..
وطن يستقبل أي غريب
يضم الخونة والأنجاس ..
وبرضو آستو ماتبكي
وبالجواكي لي أحكي
وأنا الزيك كتير بشكي
وبحاول أنوم إذا جا نعاس ¤¤

أنا والأشواق سائلين عنك
يازولة شبيهة النار والضو
والنور المارق من عينيك
بيضوي الحته الفااااضية كرو
وأنا قلبي مشحتف بيك وعليك
وريني أنا عاد شن داير أسو ؟
أكتر من أساسق يوماااتي
وأفضل أكتبلك غنواتي
ودموعي عليك تتساقط شوو ..
أحياناً تبقي الدمعة حريق
تحرق في الخد الراجيكي
ويا ستو كتير بكاني الشوق
وكتين ما إشتاق لي عينيكي
ومرات الشوق وكتين يزداد
لي شوفتك وحضنة إيديكي
أقعد أفتل في حبال الصبر
وجوايا العبره تناديكي
ويضيع الصوت المات حرقه
مابين أشواقك والشرقـه
ومابين إيديا وإيديكي ..
الوجع القطع قلبي عليك
طراني مواجعك يابــلادي
ودموع أطفالنا وكت يبكوا
بتذكر شفع في الوادي
وبطان العرب الينجاروا
الخوفهم قطع أكبادي
ولسع في بطان راجيني أجي
وأنا راجي كمان جية أولادي
يمرقوا من رحمك يا زوله
والبيني وبينك ومابينم
مابين الطلبه وسبوره
أو بين الزول البيصور
يبدع يتفنن في الصوره
والينحت إسمك في قلبو
ويحكيكي كأنك فزوره .

ستو دي لسه ماخشت القلب ياكردي ؟

قربت
يا هشوم

انتي زوله وضمة رايعة
وعنوة تدخلي في قلوبنا
كلما ماشمس الله تشرق
وبرضو صوتك يا الحنينه
في الزمانات البتحرق
في الشوارع والأزقه
والحكومات البتسرق
في عرق أهلي الغلابه
البيرجوا الرحمة تنـزل
من نقط موية السحابه
وكل ما الأفراح تجيهم
تغمر الدمعات عينيهم
والحزن يظهر يبتق
*****
إشتهـيت يا رايعة صوتك
وحالي بالشوق حال يتامه
نفسي بين لحظات أكونك
إنتي ياروحي وهـيامـه
إنتي يا الحلم البسافر
في ضجيج معني السلامه
نفسي في حضنك أقيل
انتي ما أحلي إبتسامه
ياغنيوة حروفا تعني
راحه في الزمـن القيامه
نفسي أجيك شان ماني عارف
إيه تكون دنيا العواطف ؟
وكيف يروح خجل البعاد
فجأة بين عسـل الشفايف ؟
يـوم أجيـك يا رايعة بـدري
زول متيم وماهو خايف
همو كلو حضـن حبيبه
في الزمانات القريبه
والمساحات الرحيبه
بيني مابينك أكيده
ماها بين صفحات جريده
ولاها عنوان في صحايـف !

شوفي كيف أنا مشتهيكي
برغم نكرانك وجحودك
ورغم كل البينا هسع
وبين كلامك وبين وعودك
ولسه بالأشواق أجابـد
منتظر برقك ورعودك
والسحابة البينا تبرق
بي بشاراتك ووفودك
دار أطير أنا فوق سماكي
بي جناح ناقص وقودك
دار أطير يا زولة أجيكي
شان أحلك من قيودك
وأبقي جمبك ياحبيبه
بــين رياحينك وورودك
؛؛؛ ؛؛؛ ؛؛؛ ؛؛؛ ؛؛؛
يا رايعة شوقك لو تعرفي
يبقي أموت من حرو هسع
وإندفن مابين رموشك
من قبل شمس الله تطلع
لو أموت بي طلقه أحسن
أو كمان يضربني مدفع
برضو أخير يا رايعة وأفضل
من أموت بي شوق مدرع
نحنا جينا من الغلابـه
من حضن بيتنا المشلع
مانا ناس راحات ربينا
لانا ناس زخرف مرصع
نحنا أولاد طين أصلنا
ونلبس اللبس المرققع
نركب الموجة ونعدي
وكل منانا نلاقي مشرع
؛؛؛ ؛؛؛؛ ؛؛؛؛ ؛؛؛ ؛؛؛
نرضي بالحاجه القليله
بالقليل نرضي ونغني
دنيا تهدينا المواجع
وياما قبلك ألمتني
مابتشوف حالي اليمحن
زايده في الآلام أذتني
قطعت قلبي البيصبر
بالمواجع طامة بطني
إلآ ربنا هو البيرحم
وهو البزيل أحزاني عني

طاهره زي أم عيسي مريـم
وواضحه زي شمس الله ديك ..
وشارقه في كـل المواسم
ويوم تغيـب تندسه فـيك ..
زوله تمـرق شان تخشـك
وتدخلـك غصباً عليـك ..
وتجري في داخلـك كأنو
من صغيره بتشتهيك ..
بت تجنن بت تحير بت تمحن
بت بترسم زاتا فيك .....