استعجلي وخشي القليب

تذكير بمساهمة فاتح الموضوع :

بتنفسك في الضيق شهيق يا أحلي من طعم التمر
يامالية قلبي حروف يقين من الصباح واليوم يمر
نشوان بكون في حضرتك وإتهنأ بيك طول العمر
يابت رقيقه كما الزهور نديانة والحال فيك يسر
ما أجملك والله جد لمن خطاكي تجيني من بعد العصر
وعند المغيرب توصلي تلقيني مت من الصبر
صبري العليك ماصابرو زول صبر السيوف في يوم بدر
أصحابه شادين القتال دايرين من المولي الأجر
تسمع صليلا وري الجبال تحلف تقول يا الله كر
إستعجلي وخشي القليب أناحالي دونك أصلو مر
مافيهو حتي طعم حياة ومن غير عيونك مابيسر .

شوفي كيف أنا مشتهيكي
برغم نكرانك وجحودك
ورغم كل البينا هسع
وبين كلامك وبين وعودك
ولسه بالأشواق أجابـد
منتظر برقك ورعودك
والسحابة البينا تبرق
بي بشاراتك ووفودك
دار أطير أنا فوق سماكي
بي جناح ناقص وقودك
دار أطير يا زولة أجيكي
شان أحلك من قيودك
وأبقي جمبك ياحبيبه
بــين رياحينك وورودك
؛؛؛ ؛؛؛ ؛؛؛ ؛؛؛ ؛؛؛
يا رايعة شوقك لو تعرفي
يبقي أموت من حرو هسع
وإندفن مابين رموشك
من قبل شمس الله تطلع
لو أموت بي طلقه أحسن
أو كمان يضربني مدفع
برضو أخير يا رايعة وأفضل
من أموت بي شوق مدرع
نحنا جينا من الغلابـه
من حضن بيتنا المشلع
مانا ناس راحات ربينا
لانا ناس زخرف مرصع
نحنا أولاد طين أصلنا
ونلبس اللبس المرققع
نركب الموجة ونعدي
وكل منانا نلاقي مشرع
؛؛؛ ؛؛؛؛ ؛؛؛؛ ؛؛؛ ؛؛؛
نرضي بالحاجه القليله
بالقليل نرضي ونغني
دنيا تهدينا المواجع
وياما قبلك ألمتني
مابتشوف حالي اليمحن
زايده في الآلام أذتني
قطعت قلبي البيصبر
بالمواجع طامة بطني
إلآ ربنا هو البيرحم
وهو البزيل أحزاني عني

طاهره زي أم عيسي مريـم
وواضحه زي شمس الله ديك ..
وشارقه في كـل المواسم
ويوم تغيـب تندسه فـيك ..
زوله تمـرق شان تخشـك
وتدخلـك غصباً عليـك ..
وتجري في داخلـك كأنو
من صغيره بتشتهيك ..
بت تجنن بت تحير بت تمحن
بت بترسم زاتا فيك .....

ابوحسن كتب:

استعجلت خشيت القليب ياكردي.......لكن ماتنقطع منو كتير
لك الود يااستاروانت تتحفنا بالروائع والدرر

شكرا يا رائع علي مرورك الذي ازدانت به دوحتي
دمت بود

أبقـي داخل ..
وسد علي كل المداخل !!
وأمنع الضو المروق ..
ماتفـوت جواي تودع
بيني بينك أحلي شوق ..
شوق مزارعية وغلابه
شوق مرسل للسحابه
والخطابات البروق ..!!
خلي يبقـي دخولك إنت
دخلة الضو في المكان ..
شان تفج ظلمة حياتي
إنت ياقمر الزمان ..
نور الكـون بي وجيهك
ضوي وأديني الإمان .. !!
بي وجودك ببقي عاااارف
إني بيك مليان مشاعـر ..
والدروب البمشي فيها
فيها كل اليمشي شاعـر ..
يكتب الأشواق قصيده
في الزمانات العنيـده
ويمـلأ آآآآلآف الدفـاتر ..!!
ابقي داخل ..
وأمرق الشك المعشعش
في حنايا الروح يـلاوي ..
وأنفـض الغبن البيـقعد
يملأ قلبي من الشكاوي ..
أبقي داخل شان تلحن
أحلي أبيـات الغـناوي ..

إشتهـيت يا رايعة صوتك وحالي بالشوق حال يتامه
نفسي بين لحظات أكونك إنتي ياروحي وهـيامـه
إنتي يا الحلم البسافر في ضجيج معني السلامه
نفسي في حضنك أقيل انتي ما أحلي إبتسامه
ياغنيوة حروفا تعني راحه في الزمـن القيامه
 نفسي أجيك شان ماني عارف إيه تكون دنيا العواطف ؟
 وكيف يروح خجل البعاد فجأة بين عسـل الشفايف ؟
يـوم أجيـك يا رايعة بـدري زول متيم وماهو خايف
 همو كلو حضـن حبيبه في الزمانات القريبه
والمساحات الرحيبه بيني مابينك أكيده
ماها بين صفحات جريده ولاها عنوان في صحايـف !

ربنا هو البيرحم وهو البزيل أحزاني عني

شكرا اخي عبدالله وكل سنةوانت بخير وكيف الامورات والغاليةمريم..غيابي كان لظروف خاصة ..اللمه متين؟الساعةكم؟

[rtl]وقعت بيوتنا بعد عمار
من حضرة المدعو المطر ..
وأصبحنا في الشارع نبيت
بي فعل فاعل ماقدر ..
وينو القدر ؟
والسيل يجي ويلقي البيوت
توزيعا كان في المنحدر !
ده يكون قدر ؟
والسيل يجي ومن غير كلام
بي فوقنا مر مرور كرام
مامده إيدو عشان سلام
وكان قلبو ديمه علي حجر!
ده يكون قدر ؟
إشمعنا ماشال بيت وزير ؟
بيت الوزير ما من حصير !
بيت الوزير سكنة أمير !
بنيان مسلح دار يطير !
مابيت غفير ..
شان ينضرب في عيدو جير
ده يكون قدر ؟
والشي اليغيط وزرا السجم
بيقولوا للناس أصبروا !
والجاي خير !
صابرين عليكم ومن سنين
ماشين وماعارفين لي وين
نحنا الغلابة الكادحين
نحنا الحياتنا جروره دين
ساكنين بيوت مبنية طين
والناقصة تماها المطر!
سبحانو هو ..
هادي المطر بتهد بيوت
وبرضو بتغسل في بيوت !
كده ماقدر !!
في بيوت من القش والحصير
وفي بيوت مسلحة ده الفرق!
بيت الوزير بيت من رخام
وأسمنت جايي من الشرق !
وبيت الغلابه الصابريـن
هو الوحدو بالسيل الغرق !
في أكيد فرق ..
بين زول يسف وياكل الحرام
وهدومو من ريش النعـام
وفي زول يفتش لي طعام
وفي موجة الآلام شرق !
في أكيد فرق ..
بين البيسرق في البلد
وبين البعاني عشان يعيش ..
وبين اليخم خير الوطن
وبين البيحلم يلقي عيش ..
وبرضك تقول إتصبروا ؟
صابريـن علي ظلمك زمن
ماشين وراجعين لي وري ..
والدنيا ماشة علي جحيــم
ماطالا ناكل في التري ..
إنتو الحكومة الما بتحس
ونحنا الحشانـــا الإتهري ..
اليعمل الخير حايشوف
واليعمل الشر حا يري ..
السيل بقيف ..
المشكله ! تااااااني العمار
أصلو البنا داير كتير ..
في ناس حاتبني وحاتعيش
وفي ناس حينقصم الكتير ..
أهلي الغبش أهلي الكرام
مابيلقوا حتي حقيق سرير ..
حايبنوا كيف ؟
كيف يبنوا فوقك ياوطن
وإنت البراك شفته السيول ..
سيلك تقول قاصد البيوت
مدفور محرشو يبقي زول ؟
ده يكون منو ؟
قول ليا وأحلف بالرسول !
المفترض كالآتي هو :-
يا إما حانعيش في أمان
يا إما نمشي نكوس وطن !
ووطناً ولا فيهو الأمان
ده ولاااااا وطن !
وطناً ملخبط من زماااان
ده ولا وطن !
وطناً يكون لي شعبو خان
ده ولا وطن !
وطناً يذل ولي شعبو هان
ده ولا وطن !
وطني البعــرفو وطن براح
وطناً يضمممد في الجراح
وطناً يقول أرضاً سلاح
وطناً ملان طيبه وسماح
وطناً نحبو زي الصلاح
في جوفنا بالليل والصباح
وطني العزيز الما مباح
وطني النجاح
وطني العدوهو بيتعدم
وفـــي الله راااااااااح ..
[/rtl]

وإبتدت ثورتنا يلا
من هنااااك أرض الجزيره ..
في شوارع مدني قامت
ضد حكومتنا الحقيره ..
ضد نظام جهجه حياتنا
من قبل سنـوات كتيـره ..
مدني يا أرض الجسارة
ومنبع الناس الضكارة
المابيخافوا من الزخيره ..
مدني هي القدرت تعارض
وتكــسب الجوله الأخيره ..
وبالغضب مرقت تهلل
في الشوارع قيره قيره ..

مدني عاد لله درك
إنتي يا أم المداين ..
بالخضار عمرانة أرضك
لليشوف والدار يعاين ..
والجمال الفيكي تحفه
من بعيد شفناهو باااااين ..
طيبه زي طيبة بلدنا
بي جداولك والجناين ..
وناسك الرضعـو المحنة
وفيكي كم فنان تغني
مدني حاشاكي المظنة
وفي المدن معدوده جنة
ورحمك المابيلدي خاين ..

في وطنا ده كم مديـنة
لما مدني تقـوم برااها ؟
وليه براها تثور وتغضب
وبالإنابة عن المعاها ؟
يعني باقي بلادنا نايمه
ولسة ما زحت غطاها ؟
سامعه شايفه كلام رئيسا
وراضية بي نوحا وبكاها ؟
ودي المصيبة إذا بلدنا
خايفـة من أسباب بلاها !!
وراضية بالإنقاذ تهدددم
في بيوت غيرم بناها ..
وتحرق الوطن اللي أصبح
خوفو من جورا وغلاها ..

حاتظل ود مدني قصة
يوم يغور عفن النظام ..
ليها عيد ميلاد حيبقـي
وتحتفل في كل عام ..
وتبقي عاصمة لي بلادي
وليها مننا إحترام ..
طالما الخرطوم بتسكـت
ومدني هي التبدأ الكلام ..
وهي البتمرق في الشوارع
وللوطن ترفـع تمام ..
مدني وحدها هي الشجاعه
وباقي وطني طلع إشاعه
وخاف من السلطه وضباعه
مدني سمعاً ليك وطاعه
وربـي يديكي المناعه
ومني ليك مليوون سلام ...
ومني ليك مليوون سلام ..
ومني ليك مليوون سلام ..

خلينا أخوان يابت أحسن وأفضل من أحبك وتنسيني ..

حبيتك وحاسس بي غدرك وشفتك وأنا نايم بعتيني ..

الدنيا دي أصلا يا السمحه حتفرق بينك ومابيني ..

مع إنك زاتك تابعاها ياشايله النوم من ود عيني ..

قررته أفوتك شان إنتي إنسانة ولا بتحترم الريد ..

والناس الحولك شايفاهم الفاهم فيهم زاتو بليد ..

ويافاكره غرامك يسعدني أو إني بدونك ماني وليد ..

حتكوني كذبتي علي نفسك وضيعتي سنينك وشن بيفيد . ؟

الدنيا حتمشي وماحتقيف أحسن تتراجعي يازوله ..

والقصه البايخه دي أنهيها دي حكاية وملينا فصولا ..

وإخراجك ليها ده مانافع .. والقصه دي أصلا" منعوله ..

وإتعادت أكتر من مره وطلعتي كمان إنتي الأولي ..

شان إنتي تجيدي التمثيل وإجادتك مادايره دليل ودوايرك كلها مشغوله . ،،

المشكله إنك ما عارفه ومفتكره الدنيا دي في إيدك ...

ومفتكره النـاس الحوليكي ماناس أصلا" ديلا عبيدك ..

ومفتكره كمان إنك ملكه والناس محتفله عشان عيدك ..

لكن الناس الشايفاهـم ومفتكره بإنك ذالاهـم ديل أكعب زول فيهم سيدك

عمر عثمان  تحياتنا وامانينا
يكفي طلتك يا رايع
وفرحة رجوعك بس كفى

سمعتي القلب البيهمس ينادي يقولك تعـالي ؟
وعرفتـي بحبك لانـك برااااكي الطـافت خيـالي ؟
وبراكي كمان البريدك وبحس بمقامــك العالي ؟
كده إرتحته بعد عرفتي وفهمتي حقيقة سؤالي !

والسكه غيرك طولا موت..

بلسم كتب:

والسكه غيرك طولا موت..

بحبـك ماعشان محتاج أشوفك يومي قدامي ..
كفاية أحس بأنك جد سعادتي ومصـدر إلهامي ..
وكفاي شعري الكتبتو عليك وكت ماخطتو أقلامي ..
وكفاية أحس بعشقك لي بتسعد ديمه أقدامي ..

نفسي كان نتلمه نحنا وتبقي بيناتنا الصراحه ..
ونمشي فـي الدرب البودي لي مدن عمرت سماحه ..
وكنت دايرك تبقي مشرع لي مراكبي المستباحه ..
إلآ خابت فيك ظنوني وفيكي مالاقتني راحه ..
يانهاية ضحكة مـااتت يوم صبح فرحك مناحه ..
ويوم بكيت بي حرقة منك في الزمانات القباحه ..
وإقتنع قلبي البريدك ياتعب روحي ونواحه ..
وأمشي فوووتي !
وطالما قررتي تمشي أمشي يابدر البدور ..
وشيلي فـي إيديكي حلمي يانهاية كل سـرور ..
وأمشي في دربك براكي وقولي للأفراح تغور ..
ما الفرح في ظل وجودك يبقي زي سرب الطيور ..
التسافر لما تعرف مافي بين الظلمه نور ..
الوداع !
الوداع يا أحلي قصـة ويارواية ملاانة خوف –
وكيف يشيل الزول صباعو ويطعن العين التشوف ؟
يا الطعنتي إنسان عشانك إنـضرب مليووون كفوف –
في وطن محتل يناتق والمساكين بالصفوف –
والوداع أحيان بيبقي زيو زي طعن السيوف –
إلآ مجبور إني أفـارقك شان حياة الناس ظروف -

ياتعب روحي ونواحة أمشي فوتي..

بلسم كتب:

ياتعب روحي ونواحة أمشي فوتي..

نفسي كان نتلمه نحنا وتبقي بيناتنا الصراحه

اديتك سري وجهر اهلي ماقايلك يوم ح تجافيني..

شكرا وكتر خيرك وماقصرتي كونك تهدتي حياتي مآسي..

شكرا بلسم على مرورك

شن بفيدك !!
من مشاعر ميتة جواك
ومن سنين ما قادره تطلع ..
ولما قلبك قل دقو
وحتي عينيك بادية تدمع ..
يوم فقدته حبيبة كانت
لي غناويك أحلي مطلع ..
زولة شقيش مارحلته
شان عينيها تعود وترجع ..
كان تريدك ريد حقيقـي
وياما جواك كان بتزرع ..
كل صفات في الدنيا حلوه
وكان تشوفك إنت مشـرع !!

هسه لم حزنك عليكا
وشيل همومك يلا أرحل ..
فارق الأوطان وهاجر
وإقتنـع بي واقعك أقبل ..
أصلك إنت ملااان عوارض
وفي عينيك بالهم مكحل ..
إتولدته تفيض مواجع
وكنته زول يومااتي تخجل ..
داسي همك جوة قلبك
وبالهموم راقد مكبل ..
في ركن مجدوع براكا
ومافي زول عنك بيسأل ..

ماتقول دي القسمة أدت
الله مابيقسملك آهه ..
إنت براكا إخترته وجعك
وكنت جد إنسـان دلاهه ..
إرتضيت والهم قبلتو
وقسمتك ماجات براها ..
القسم معروفه أصلا
خيرا جايي عقب وراها ..
وإنت خيرك وين مكـانو ؟
وين أراضيهو وزمانو ؟
يبقي فات قبال أوانو
وشالتو الأحزان معاها !!

جريت وراكي جنس جري
لاااااامن رجولي إتشققت ..
وحفيت علي دربك سنين
وأحلامي فيك ما إتحققت ..
وآخر المطاف عيني بكن
شوفيها يـيدي إتورمت ..
وشعرته بالندم الشديد
ساعة الدروب إتغيرت ..
وودتني لي عالم غريب
فيهو العوارض قيلت ..
أنا أصلي من دون الخلوق
آلآمي ليا إتفصلت ..
وجواي بتهرد في حشاي
مشكوووره تب ماقـصرت ..

والناقصة بتتم كل يوم
حرقة ومواجع وإنكماش ..
في ظل وطن مليان هموم
بتجيـكا سااااكت وبي بلاش ..
وغير الشكية من البلد
جوة البيوت مافيـش نقاش ..
الناس خلاص عدموا النفس
مخنوووقة حد الإرتعاش ..
وكل الـدروب إتقفلت
والفاتحة بتجيب الطشاش ..

ونظام عجيب !
روتين وثابت كل صباح
إنك تموووت بالهم كمد ..
وتشيل هموم عيشتك براااك
في حضرة المدعو البلد ..
لاك أبن نافع ولا البشير
غلباااان وماكا ولد عُمد ..
تربال وحي علي الفـلاح
وربك برااااهو الليك سند ..
عايش كما الطيبين تراك
ومافي اليشيل الشيل معاك
ومستني من الله المدد ..

أكتب شنو ؟؟؟؟؟؟؟؟؟؟
مالاقي حاجه توصفك .. ؟
وحتي الحروف محنت عديل خجلانه زاته في حضرتك ...
يا جاي من شفق المغيب وفايت سماحتو ببسمتك ...

عندما أحببتك تمنيت لو مت قبل ان اراك مخافة الفراق،وعندما افترقنا مت الف مرة فصرت لا اخاف الموت ولكني اخاف الحب

عندما أحببتك تمنيت لو مت قبل ان اراك مخافة الفراق،وعندما افترقنا مت الف مرة فصرت لا اخاف الموت ولكني اخاف الحب

دي زوله بتبني من الريد
بيوت مسقوفه بالرحمه ..
بنية بتدي حس للريح
إذا كان الوضع زحمه ..
كريمة أجواده زي النيل
كتير حسيـتا زي نسمه ..
تخش تهدي الطراوة بيوت
بيوت الفقرا والكتمه ..
بنية أصيلة بنت الريف
تقود بلدا كسيح وكفيف
بلد محروم من البسمه .

بلسم كتب:

عندما أحببتك تمنيت لو مت قبل ان اراك مخافة الفراق،وعندما افترقنا مت الف مرة فصرت لا اخاف الموت ولكني اخاف الحب

تعلمت من التجربة ان الخوف والحب كليهما عملات لوجهة واحدة
تسلمي بلسم - جد سعيد بمرورك

راوياني ليه ؟
ماطالا حاتمـشي ووراك
من تاني بشعر بالعطش ؟
عارفاني من بعدك بضيع
يكفيني قلبي الإنخدش ..
والسكة غيرك طولا موت
وأنا فيها حتما حا أطش ..
يازولة حبيتك يقيـن
وزي البعرفك من سنين
فجيتي من قلبي الأنين
وبناي معاك وصل العرش ..
رايداني ليه ؟
ماكان تخشي حياتي شوق
وتمرقي من باب الحزن !!
كيف تستقلي أشواقي ليك
وتمليني بالأسي والغبن ..
أنا ياما شانك إرتضيت
عيشة البنادر والمدن ..
جوطة المطارات والضجيج
وغرف العمارات والسفن ..
ناكراني ليه ؟
وأنا أصلي معتاد الفراق
فاتوني يااااما أحباب كتار ..
لكن كمان إنتي البراك
الكنتي بالجد وماك هظار ..
أديتك الوفا بالكتير
رغم العوارض والغبار ..
وكتبتلك أحلي الحروف
رسلتهن ليك مــن بدار ..
ناكراني ليه وأنا بيك بكـون
فرحان وكاسيني النضار ..
ويوم كنتي إنتي وعود وريد
أنا كنتلك بحر إنتظار ..
ياجاية هسع تنكري
وللبينا ترفعي للستار !!

بصارع شان لقاكي زمن
وأحارب دربك المجهول ..
عقب شديت رحالي عليـك
وكيف ألقاكي ؟ مامعقول !!
كفاية الضقتو من ويلات
مواجع بالعرض والطول ..
أنا الكايـس مدن منفاكي
في وطن الهنا المكتول ..
أزتني بلادي بي وجعاتا
كم من زيي محروم زول !
كفـاية عليا أعتر فيك
وألاقيك يا السلبتي عقـول ..
أرافقك نمشي زاتنا بعيد
نضع لي زاتنا حد وفصول ..
أنا الموجعني إنتي وطن
ومافي وطن بخونو القول !!
فقولي إنك وطن لي شخصي
قولي إنك عشاني سهـول ..
أراضي وقايمة في جواي
تبشر بي نجاح محصول ..
ومحصولك إذا في نجاح
نجاحو يقابلو مني ذهـول ..
عشان جواي نمت شتلاتو
قبال ماتتم الحول .

ماني إنسان يخاف الوجعه من غدر الحبيب والجور ..
ولا بعمل حساب لي روحي أصلاً إتخلقته صبور ..
حنين لامن مدفق ريده ملان إحساس وكلي شعور ..
بقولك ودي الحقيقه أظن لا كاذب ولا مغرور ..
 بس لكن وحات البينا ماشفتيني لما أثور ..
بركان وإتفجر والله لو كل المعاني تغور ..
شن فايدة حبيب يجهلني ؟
وأنا الضحيت عشانو دهور ..
يرحل يمشي يهجر عشي ياااما فارقتني طيور .

الى روح الراحلين
مصطفي سيد احمد - حميد حسن سالم
ديل إتنين فهموها وبدري
فاتو وسابو الدنيا عذاب ..
وخلو الوطن الطلعت روحو
وطن العزه المابيتعاب ..
وكانوا إتنين بيهزو العالم
فاتوا وخلو حياتنا خراب ..
وقنعانين من خيرا فينا
ومن بلدا حكامو كلاب ..
وشن فايدة وطنا يطردنا
ويملأ قلوبنا غياب في غياب ؟

ديل عرفوها وسابو الدنيا
وتركوا نعيما إن فيها نعيم ..
وياتو نعيم في الوطن اليقلع
وماساب لينا فرد مليم ؟
وطن ينهب ويسلب فينا
وماحسسنا بأنو رحيم ..
وكل وطن في الكون الواسع
شعبو سعادتو حدودا الغيم ..
إلآ وطنا ده حالو براهو
لا إتثقف لا شاف تعليم !

أنا عن نفسي كرهته العيشه
في ها الوطن الطبعو أناني ..
وطنا يدي العسكر خيرو
وشعبو يقضي حياتو يعاني ..
الكادحين في هادي البلده
قدر الوجع الهده كياني ..
والقاعدين في سكك الشارع
ديلا طلبتك يا سوداني ..
ناس من أولي تذاكر وتتعب
وبعد الجامعه تشيل هم تاني ..
هم الخوف من باكر وويلو
بطاله عطاله ومافي أماني ..

ورغم الواقع الهسة ذكرتو
الإنقاذ بتتم الباقي ..
وطنا كان واسع ممتدي
وخيرو يدففق في أعماقي ..
وحتي الأرض الرغم وساعا
كانت تفرح بي أشواقي ..
وهسه خلاص الوطن إتعري
وما أظن يسترو يوم عراقي !
ومابستغرب يوم ما أسمع
زول بيبيع الوطن الهسع
ويرجي كمان يدوهو الباقي ..!