استعجلي وخشي القليب

تذكير بمساهمة فاتح الموضوع :

بتنفسك في الضيق شهيق يا أحلي من طعم التمر
يامالية قلبي حروف يقين من الصباح واليوم يمر
نشوان بكون في حضرتك وإتهنأ بيك طول العمر
يابت رقيقه كما الزهور نديانة والحال فيك يسر
ما أجملك والله جد لمن خطاكي تجيني من بعد العصر
وعند المغيرب توصلي تلقيني مت من الصبر
صبري العليك ماصابرو زول صبر السيوف في يوم بدر
أصحابه شادين القتال دايرين من المولي الأجر
تسمع صليلا وري الجبال تحلف تقول يا الله كر
إستعجلي وخشي القليب أناحالي دونك أصلو مر
مافيهو حتي طعم حياة ومن غير عيونك مابيسر .

بقيت عليك زي الغريب ..لاشوق بودي لاريد بجيب!
لارضيت أكون ليك الحبيبه القريبه ولاكنت لي الحبيب القريب!

معاك زمن الفرح تواه فقد معناه ليهو سنين
وأريت الماضي لو ننساه ويكون قدامنا صبح الحين
عذاب قلبي المحق في بكاه قساوتك وإنتظار أمرين
فراق كان للأسف عشناه وحصادنا المنو فرقه شتات
تصدقي ماقدرته أشوفك مجرتقه وإنتي سايره عروس
ونشف عرق الهوي البتق في أطيب أرض مغروس
غريبه نقول زمن فرااااق ونحنا علي الفراق بنكوس
تسيل دمعاتنا تتدفق وكيف بتفيدنا يوم دمعات ؟
عيونك ليه علي تقسي وأنا العلمتها الأشواق ؟
وقليبك كيف يجور ينسي ويسيبني أنا فوق جمر حراق ؟
وحيد خلاني دون مرسي أقاوم في زمن فراااق
وعايش فرقتك هسع وكيف أحوالي في الجايات

واقف براي في حضرتك راجيك تجيني من السحاب
ستو المطر .. والإرتوي .. مافيها حته من السراب
ستو اليقين في ها البلد مالينا لي حد الرقاب
ستو العشم والأمنية ستو الصغار حتي الشباب
دايرك تشوفي لي وطن طيب نفوس ويرحل يفوت الإكتئاب
دايرك معافي وماك مريض وتكتب تصاريح الإياب
لي كل زول فاتك زمان كان يشكي من مر الصعاب
يرجع يعود ليك من جديد لا آهة لا هم لا عذاب
وتظلي يا ستوالحنان وكل الأمان وأجمل كتاب
بقراكي ليل - يا أحلي نيل - بالك طويل -
باقيالي حيل - وصبري الجميل رغم المصاب
،،،،،،،،،،

ماتتوجع ماتتأسف ..
خليني أنا إتأسف..
يوم سكنتك أنا جواي وقليبك لي
ما أنصف..

رائع

جايي ليكي وقلبي متلهف شديد ...
ولو سلامك ليا عادي أخير لي أرجع من جديد ...
ياكمان أقعد أسالمـك بي حضن زولا" بريـد ...
ياخ أنا إتعذبته بعدك من رحلته مشيت بعيد ...
وكل يوم إشتاق وشوقك في قليبي دوام يزيـد ...
جايا ماده ليا إيدك وقلتي كل البينا ريد ...
البينا نحنا غمامه راحله للغلابه بتبقي عيد ...
البينا نحنا مطيره تنزل لي حراز زعلان أكيد ...
بيني مابينك موده البينا أقوي من الحديد ...
مابيفيد لمن أسلامك زي بيشحد مادي أيد ...
*****
ده أقل حاجه تخشي فيني وأبقي حاضنك للنهاية ..
يافرح عمري وهنايا .. ياهدف جوايا غايه ..
ولما يتحقق منايا دابي أفرح أكون سعيد ...

جيدك ماقدر سلسل هواي لا برضو عندك إيد
لا كنتي يوم قدري لا كنتي قدر الريد
أديتك المافيش وأهديتك أحلي قصيد
لكن طلعتي سراب ينشاف من مكاني بعييد
شكرا" شان طعنتي قليب مات في هواكي شهيد
كان ينبض الأشواق حباكي إنتي شديد
شكرا" جزيلا" ليهو كم يوم من فات العيد
وكان ده عيد مسخان مافيهو اي طعم للعيد
بعدك كرهته الحب وكرهته إسمي وليد

لما تبعدي عني إنتي كل حياتي تكون سراب
وكل ثانية بعيده منك ليها بحسب كم حساب
شان غيابك ماهو عادي حاجه بتعذب عذاب
ستو بترجاك تكوني جمبي في زمن الصعاب
شان بلاكي أنا زول مشرد والحزن فاتح لي باب
باب يودي علي المصايب في زمن موت الشباب
أبقي جمبي وحات عيونك أروي شوقي بعد يباب
شيلي حزنك من عيوني دثريني من السحاب
في وطن أمطارو أدت كل بيوتاتنا الخراب
فيها مافي بلا المصايب لابتنفع للشراب
ستو بستناك تعالي وماتكتري في الغياب ..

أنا لسه منتظرك تجي .. تجي زي غمامه وزي خريف ،،،
تجي زي مطر تجي زي رزاز أوعك تقولي أجيكا كيف ؟
لازما" تجي وهسع كمان بس ماتقومي تجيني ضيف ،،،
خشيني دغري كما الكلام زي دخلة الصوت الرهيف ،،،
ماتمرقي خليكي جواي باقي روح انا أصلي من غيرك ضعيف ،،،
...
مابحمل الغيبه التطول غيرك حأبقي إنسان كفيف ،،،
وإنشري في جواي بحر ما أظن يحوشك إنتي قيف ،،،
خليكي وااااضحه زي الشمس مهما سماي أصبح مخيف ،،،
خليكي سيف يقطع عصب كل السكات يملاني كيف ،،،

إشتقته ليك شوق العيون لي شوف حبيب لا جايي هسه ولا قريب
وإشتاقت الأحرف تجيك رغم الزمن قاسي وصعيب
ياستو كيفن أوصلك وبي يات دريب ؟
قوليلي يا أجمل وطن قوليلي ياوطني الحبيب
قبال يهاجمنا الكبر لا نلقي ادوية لا طبيب
وكل اللي بينا يروح سراب يركب كمان في قطر عجيب
وكل العمر يرحل يفوت وتنزل دميعاتك نحيب
لا نلقي منفذ لابراح من وجعة الشك المريب
خليني إستناك حضن وألقاكي في كل الدروب اللآ بتودي ولابتجيب
يا أحلي من لون الشمس وكتين توادع دار تغيب
ما أروعك ياستو جد وكتين جروحي البي تطيب
وألقاكي في الزمن اليكون مافيهو آهة ولا في عيب

وإتفرقنا .. زي فراق جمل الطريفي وفرقة الزول
الولوف
كلو عادي .. الماهو عادي إني غيرك مابشوف
وإنتي مافاهماني
لسه مالية قلبك كلو خوف
إنتي جواي قاعده وحدك وذكرياتك هي التطوف
إلآ لكن ياخساره لما تبقي إنسان عطوف
في زمن هجر الحبيبه والعلاقات
الكسوف
كنت مفتكرك فهمتي إنتي دنياي لو عرفتي إنتي ياك زولي الولوف
إلآ قلبك بي غباوتو حطم الريد بي سلامتو وعلم القمر الخسوف

ستو بتعاني المواجع تشكي من وجع الرتابه
ومن ملل لازم حياته في بلد كره الكئآبه
ماكي وحدك ياحليوة لوكي بس صبر الغلابه
واليجيك من الله خير ولسه حاتمطر سحابه
ياني زيك في المواجع وديمه مفتوح ليا بابه
إلآ بس نرجاها تفرج مهما قلبنا إبتلابه
إمتحان من الله أصلو شفتي كيف صبر الصحابه ؟
لما قرروا يوم يهاجروا زهجوا من مكه وعذابه
لما عمار بن ياسر ضاق عذاب مكه وكلابه
وفي النهاية المولي نصرو وكل دعواتو إستجابه
ستو خليك في النهاية زوله بتفيض بالمشاعر
يا حبيبه كما الغمامه ياني بيكي أنا زول وشاعر
وأحملي الوجع اليقططع في حشاي وانا ماني قادر
أبقي قرية وهيطه دايما" لما بتضيق البنادر مهما إمتدت رحابه

غرته عليكا من شوقي لما أسوق خطايا إليك ألاقي خطاهو قدامي
وأحسك شوق ،، شوق الواطه للواسوق فيافي بتدمي أقدامي
أحسك فيني منبع ريد وأشواق كل يوم بتزيد تودر فيني أوهامي
أحسك زي وطن ممدود وبالأفراح دوام بتجود يا القويتو إسلامي
إذا كل الأرض زيك تضوي هواي ومن ضيك سطورك تبقي أقلامي
بتسكن فيني مجري الدم بلاك من تاني مافي عشم عيونك مصدر ألهامي
أريدك ريده دغرية وأشواق ليكي كمية وبراي حسيتا في منامي
تعال نتلمه من تاني .. تعال أمسحلي أحزاني
تعال عينيكا واحشاني .. بضمك بي قلب حاني
وأغنيلك غناوي الشوق من ألحاني
ونبقي أنا وإنته والدنيا أعز أصحاب
ننوم نقفل علينا الباب وأكون حققته أحلامي

ستو..ستو..إستعجلي وخشي القليب..ابداع كردي ستار

وإحترته فيك أنا ياقمر
ومن قوة العين العليك ...
معقول تكون ماشفتها ؟
بت أحلي منك ومن وشيك ...
بت زاته مابتشبه بشر
لا زاتو تشبه حاجه فيك ...
أنا كنت مفتكرك تغيب
تندسه من حزنك عليك ...
تتواري تغطس في السحاب
وماتخلي زول يتسلي بيك ...
أصلو الفرق بينكم كبير
في يوم بسوقا معاي وأجيك ...
وعاين براك ياده القمر شوف
الفرق تلقاهو أبعد من بعيد ..
والله ضمه بعيد شديد ..
هادي البنية بنية عيد ..
بت جايه من زمنا" سعيد ..
فوت ياقمر إندسه أخير
خليها تملأ الكون شعاع ..
خليها حتجيب اللي ضاع "
تبقالنا مركب والشراع ...
مازيك إنت علي الأقل
في يوم علينا تقول وداع ...

وإحتجتلك حوجة غريب في
دنيا عاميها الضباب ...
وإشتقتلك شوق الجروف
اليابسه تحلم بالسحاب ...
وبكيت علي بي حرقة الوجع
اليهد عمر الشباب ...
من شوقي ليك قربته أموت
وأدفن مشاعري دي في التراب ...
ما أجملك ي ستو غيم مطره
وخريف يروي اليباب ...
تنزل بشايرك للأرض زغروده
في وسط العذاب ...
دار أحضنك وإندسه فيك
نسيني لحظات الغياب ...
يابت مؤدبه في الكلام غيرك
بكون إنسان مصاب ..
والصادني في بعدك كتير
مابتوصف يوم في كتاب ..

خوف بيأسرني المغارب
ويبدأ قبال المسا
وتبقي من ضمن التجارب
قصة الريد والأسي
أنا لسه بالأشواق أغالب
لوعة القلب القسا
حين شعاع أفراحي قارب
قال لي طاريك مانسي
ليهو بتعبر وأجاوب
حالو كيف بالله أمسا
عاش زمن فرقه ومصايب
ومر ليالي الدامسه

خشيت عليكي كما المطر
وكتين يصب يملأ المكان ...
أرويت دواخلك بالرزار
نقطته ليك الشوق حنان ...
يابت بتعني وطن وهيط
بالرغم من جور الزمان ...
إشتقت ليك شوق الطيور
لكني ماعندي الضمان ...
وإنك كمان مشتاقه لي
راجاني أديكي الأمان ...
ستو البتوزن كم بلد
جاياني من حور الجنان ...
بت تشبهك ياده البلد
ويمكن تزيد منك كمان ...
في الروعه والفال السمح
بت غالية عندي وليها شان ...
تشبه ملامحك ياسحاب
ويادوبه في عمر الشباب
بت واضحه خاتيها الضباب
بت واحده والباقيات رهاب

كلما إتذكرتك إنتي جاني
إحساس بالرحيل ...
متجه قاصد عيونك
مهما كان دربك طويل ...
ياتو عارض دار يعارض
ويمنع إحساسي المقيل ؟
ويات مدينة تدس عيونك
وقادره لي عينيك تشيل ..؟
لما أقرر إني أجيكي حا أجيكي
لو يكون لقياكي إنتي
يبقي تامن المستحيل ...

متي تقرر كردي استار..ابداع شكرا"وليد

شجون كتب:

متي تقرر كردي استار..ابداع شكرا"وليد

جيتي من وين إنتي زاتك
بي حضورك والغياب ؟
ياتو مشرع جابك إنتي
ياتو غيمه ويات سحاب ؟
ماكي عارفه الدنيا ديا
ضاجه بالشقا والعذاب ؟
واللآ إنتي تكون نسيتي
إنو قدامك سراب ؟
حقو ترجعي ياحبيبه
مابيفيدك ها الخراب ...
ما البلد صبحت مآتم
والدمع بل التراب ...
والغلابه محل تفوتي
والبيوت ماهن بيوتي
وفارق العمر الشباب ...
والوطن ملياااان مآسي
ضمه شيب ليا راسي
والحلم خطفو الغراب ...
والحزن في كل وادي
أسمعي أخبار الروادي
وختي بالك لليناااااااادي
للجاي والماشي غادي
شان تعرفي وجع بلادي
وكيف مغطيها الضباب ...
مافي حاجه عشان تشوفي
مات عشم شعري وحروفي
والفرح مات جوه جوفي
والسعد ينشاف رهاب ...
ياحليل زمن الحبايب
والأهل والكان قرايب
والنجيمات والسحايب
والجرح وكتين يطايب
ولمة الناس والصحاب ...
هسه مافي إنسان تشوفو
وكل زي غرقان في خوفو
طاشه كلماتو وحروفو
والبحر حردان جروفو
وكل زول راقد مصاب ...

ياساتر ياوليد أرجع؟ألحقيني ياستو

وإنتي معاي بنبني بيوت
تكون مبنية بالأشواق ...
ونفرشا بي مشاعرنا
غرف مطلية بالإشراق ...
عناقريب من حبال الود
ملاياتن لأحلي عناق ...
وإنتي معاي بيكفيني
أعيش في ضلك الرقراق ...
وتكون الدنيا في عيني
مشاعر ساكنة في الأعماق ...

ياجاية من عمق الكلام
إنشوده في الزمن الهزيل ...
ياطالعه من بير السلام
سمحه ومنوره كل ليل ...
ياداخله في شهقه نفس
طال إنتظارو مع الرحيل ..
ياقاعده جواي باقي روح
في عز شموس الحر ضليل ...
يامارقه ماشه علي البيوت
لابسه الفرح فوقك عديل ...
ياباقية في البلد اليضخ
يوماتي في الأسي والعويل ...
يانسمة جات شايله الخبر
في حضرتك يحلي المقيل ...
ياوافية بي صدق الرسل
وقطرات دموع عشقك تسيل ...
إستغفري وأمليهو قلبك بالصبر
ما القيف مصيرو يجيهو نيل ...
وقلبك يزغرد فرحه ليك
شان كان كمان صبرك جميل ...
والدنيا مهما تكون خراب
وحلمك يخطفنو الكلاب
أو مره طار شالو الغراب
لابد يصادفك يوم شليل ...
وتنزل مطيره من السحاب
وتبل أراضيكي اليباااااااااب
ترتاحي من مر العذااااااب
لاهجمه لا هوهيو كلااااب
لا جمله بتموت في كتاااب
وأجيكي أنا .. شايل الهنا
ومانع دميعاتك تسيل ...

واااا حرقة الزول اليجيك
يلقاكي ميته من الضحك ...
واوجعة القلب اللي كان
دايما" ينادي ويندهك ...
معقولة تبقي كما الحروف
بالموية دايما" تنسهك ؟
من ياتو طين خلقوكي بس؟
طين الوطن مابيشبهك ...
عمرو الوطن ماجاب غرور
وإنتي الغرور في مشيتك ...
عمرو الوطن ماكان خداع
وريني لو يوم جهجهك ؟
الواقع المحتووووووم هنا
مافيهو حاجه تضحكك ...
الناس تعاني من الوجع
دمع الغلابه نزل ترع
مرق الرواكيب دار يقع
حق المساكيييين إتقلع
حيكومه تسرق بي طمع
وأنتي الضحك دار يشرطك ...
أرضك بتشكي من الشقوق
والدم جمد فوق العرووق
عمرو التحت ماببقي فوق
شوفي الغبار الكندكك ....
عمرو الضحك مافشه زول
تتفشي في الوطن البتول ؟
وريني لو كان ليكي قول ؟
ياضاحكه في عز محنتك ...
في ها البلد مافي الجديد
والناس مقيده قيد حديد
لا فرحه بي هدما" جديد
لا نسمه هابه من الصعيد
المات وجع مامات شهيد
والدمعه تنزل ومن بعيد
نازله وتجرح في الخديد
مات العشق مات كل ريد
من تاني وينو اليعشقك ؟

واحرقةالزول البجيك يلقاك ميته من الضحك..وين يابلسم تردي

شجون كتب:

واحرقةالزول البجيك يلقاك ميته من الضحك..وين يابلسم تردي

واوجعة القلب اللي كان
دايما" ينادي ويندهك ...
معقولة تبقي كما الحروف
بالموية دايما" تنسهك ؟


شجون سعيد بي مرورك

ستو ضلت من طريقي ولسه ماعرفت بريده ...
ولاها حست بي مشاعري ورعشة الشوق البعيده ...
ستو بالجد ألمتني قصتك يا أحلي ريده ...
يومي بسهر بيها وأنزف وكلما تكمل أعيده ...
ستو ياخ البينا نحنا زي حروف في نص قصيده ...
وزي وطن بالصح بيضحك من حكاوينا الوليده ...
وزي بلد ربت ولادا علي قيم سمحه وفريده ..
ستو يا أحلي الغناوي وفرحة العيد الشديده ...
أبقي زي نخلة جناين ديمه تفخر بي جريده ...
وفي النهاية أعرفي إنك إنتي محبوبتي الوحيده .

معليس كردي إنت عامل زي الحاج مزكر قال أنازولتي الحبيتها لامن عروسوهاما قدرت أقولها بغم..إنت غلطان فيها إيه لو قلتها ياستو بحبك أكيد كان بادلتك الإحساس..مشكور للقصائدالرائعة وليد

شجون كتب:

معليس كردي إنت عامل زي الحاج مزكر قال أنازولتي الحبيتها لامن عروسوهاما قدرت أقولها بغم..إنت غلطان فيها إيه لو قلتها ياستو بحبك أكيد كان بادلتك الإحساس..مشكور للقصائدالرائعة وليد

انا كلمتها يا شجون لكن هي
متخيلا انو في واحدات تانات مشاركاتنها في ريدي ليها

ريد وإنتهي وكالعاده مات زي مابتموت الأمنيات ...
قصة غرام عاشت جواي والليله فات فيها الفـوات ...
متوقعك يادي البنية المن جحيم عارف قليبك زاتو مات ...
وخسارة فيك حتي العشق وخسارة فيكي الأغنـيات ...
ضيعتي زمني بلا نفاع وحتي العمر قدامي فات ...
غداره أتاريك إنتي دي ومخلوقه من أبشع صفات ...
مغروره إنتي علي شنو ؟ وتتكبري القالك منو ؟
والسكة يومي شتات شتات ...
بنساكي لو تبقي الحياة إيه يعني غيرك كم بنات ...
راجات إشارة عشان يجن لي قلبي من كل الجهات ...
والواحده توزن كم بلد في ثانية ترجعي ذكريات

أها دابو كدة أنت بتحبها..وزي ماقالت نضال (أنابكرهك)..صدقني كل قصائدك في كفه ودي في كفه إنتظر واديني البشارة

انا من معجبي شاعرنا حاج وفا وعندو قصيدة اسمها عفاف :
عيدميلادي يوم ولدوكي يوم سماكي ابوكي عفاف
أصلي اليوم داك فرحت فرح الحج مكه وطاف..
وماك شبه الرقيص في الدارة لناسا"قلوبا رهاف..
بعدالبشارة وربنا يجمعك بستو أكتب لها عيد ميلادي بإحساسك إنت..

تحياتي شجون
اليكي قصيدة الاستاذ الحاج محمد سر الختم
عفاف
عيد ميلادي يــوم ولدوكي يــوم سماكي أبوكي عفــاف
اليــوم داك انــا اصلي فرحت فرح الحجة مكة وطــاف
بي فــارق الصبر راجيهـو شهـرك شــان يهل ينشــاف
أشــوفــك ومنـك اخذ زادي وامشي الديـر مع العكــاف
مـــاك شيه الرقيص في الدارة لي نــاساً قلوبا رهــاف
الفي الــدارة فيـــك مــا اتكفي والورا لا سمع لا شــاف
جيدي رقيصـك ابدعي فيهو وري من الفنـون اصنـاف
نـــوعي لــوعيبــو قلوبنـــا مـــا نشفتــي ريقنـا نشــاف
الحضــر العقـد شــال حقـو وانـا وابليس طلعنا نضـاف
ابليس مـــا قدر غشــاه وانا اصلي بقيت مدروش ولاف
قلبـي عليكي احــن من امي قلبــك ليه معــاند وجـــاف
والا اصلك قصدتي هلاكي درتي هواي يموت سفساف
عنتر جاء السجن شـــان عبلة مسكين ما لقي الانصاف
وغيث هـــاجر قصــد دار ليلــي غيــرن زي بـالالاف
عيـــن اسمــك عبــدتو عبـاده هو النساني حرف الكاف
وقلبي اصبح هوهو هواكي طلق ناس سعـــاد وإلطــاف
عشـــان ود عينــك ابا يتــلاقي للــزول الشنـابرو خفاف
اقرب ادور اكون في حماهو اصل لاحد حموهو واخاف

قلب المحبين يوم يئن
قطعا" علي الدنيا السلام ...
وكل المشاعر حاتموت
ويبخل علي الأرض الغمام ...
والناس تموت في ها البلد
لو حتي بي قحه وزكام
شان الجسم فقد أي شي
لا ريده لا في كمان هيام ...
قلبي اليئن من شوقي ليك
يا ستو وينك في الكلام ؟
شان الحروف فاقداك جد
فقد المصلين للإمام ...
سبحان من أداك شعور
في دنيا ناقصا بس لجام
مشدود علي خشم الوجع
في نص بيوتات الرخام ...
تبت يدين ماترسمك
يا ستو بي ريشة غرام
غصبا" عن الواقع السواد
وعن كون مهضلم بالخصام ...
ستو الليالي المابتطول
ستو المطر وكره النزول
شان ماتكِسر ها البيوت
بي موية أو هجمة سيول
ستو البتشرق في وطن
أسود يعاني من الظلام ....

تسلم وليد وشكرا"علي القصيده..وشكرا"لستو الطلعت هذا الإبداع وياستو استعجلي وخشي القليب

شجون
حد ما أشوفك في رؤاي
بشعر وحاتك بالأمان ...

ماتت قوافي الكلمه فيك
وإتيتمت كل الحروف ...
والوحشه ساساق الدروب
يوماتي في حنك تطوف ...
والعين مكحله بالسواد
ماقادره من بعدك تشوف ...
وتعب شديد من فرقتك
ومرات تعاند ها الظروف ...
ستوالبلد ضاقت كتييير
وما كل البشر فيها خير
كرهت خطاوينا المسير
والكون مستف كلو خوف ...
وطنك صبح يا ستو مر
والحاله أبدا" مابتسر
حتي الصبر مل الصبر
صبرا" علي الحال الأمر
سنوات بتجري ضياع عمر
والقمره مالت للخسوف ...
والكون مستف بالغبار
والنيل طمي ومليان عكار
فارق بيوتاتنا العمار
والونسه ضحكات الهظار
والعيشه نار كيف نحمل
الجايين ضيوف ؟ ؟
لكني بيكي ملان شديييييييد
شان إنتي جواي أحلي ريد
ستو البتجري علي الوريد
ستو البتمنحني القصيد
ستو التنادي علي وليد
تحضني كل ما النار تقيد
تحميني من طعن السيوف ...

ابو مريم كل سنة وإنت بخير..
اولا" أنا من عشاق الشعر عامة" وكردي كتاباته رائعة فأحيانا عندما يجعل ستو وطنا"تشعر كأنك مواطن في وطنها ولكني لدي مايمنعني أن أعلق سياسيا"..أما إن جعل ستو حبيبة فتشعر كأنك تخاطب حبيبتك أحيانا"فأنا شخصيا أتمني أن أكون ستو تلك الملهمة لكن هيهات يا ع الله.لكم التحية..

أدخل عليك كيفن وإنتي
المقفله أي باب ..؟
دربك مستف بالأنين ينشاف
بعيد ورهاب رهاب ...
والسكة أبعد من خطاي
وأنا بدري فارقته الشباب ...
لا حول من حالي العلي
أنا حالي مشحون إكتئاب ...
مافوقي حيل شان أوصلك
يابت بعيده كما السحاب ...
ياقاعده حارساكي النجوم
أصلو القمر فارقنا غاب ...
من جيتي نورتي الديار
فارق بيوتاتنا الضباب ...
ياريتني لو ألقاك معاي
يمكن يفارقني العذاب ...
وأنا وإنتي نتحدي الظروف
نتناسي لحظات الغياب ...
ووطنا يصبح كلو خير
ياملكه إنتي وأنا الأمير
وماطالا مليانين سماح
ممكن يضمنا فد سرير
ماطالا جمبي ولا بهم
وإنشاء الله دنيانا التطير
ماطالا ستو حبيبه لي
حا أكون غني والغير فقير
شان ستو صاحية ولابتنوم
لايوم يموت فيها الضمير
لا لحظة بتهاب الصعاب ،،،

عبد الله
شجون
تحياتي
وبالجد تعليقكم اسعدني بس خلوني الاجيكم متمهل
وليكم تحيات النمل في بقاع اليتيمة

ابو مريم دمت بخير..
حبي للقامة الراحل وتقديري له بعدد ماكتب من شعر ونثر بل بلا نهاية فكان الراحل ذات تواصل دائم معي صدقني إن قلت لك حتي الآن لم افق ولم أصدق رحيله فله الرحمة..

عبدالله ابوغرة كتب:

وإتفرقنا .. زي فراق جمل الطريفي وفرقة الزول
الولوف
كلو عادي .. الماهو عادي إني غيرك مابشوف
وإنتي مافاهماني
لسه مالية قلبك كلو خوف
إنتي جواي قاعده وحدك وذكرياتك هي التطوف
إلآ لكن ياخساره لما تبقي إنسان عطوف
في زمن هجر الحبيبه والعلاقات
الكسوف.
يا كردى سلامات ده كلام عميييق وقوى. مابيشبه الساعة12 وعشرة حبات
اعتقد وبى شدة فيه احساس عالة جداً بل وايقاع سريع حتى فى الكتابة سريع بجد!!
الماهو عادى ..... ياخى قصة مثل جمل الطريفى دى كيييف؟


ثم الابداع

الناس تعاني من الوجع
دمع الغلابه نزل ترع
مرق الرواكيب دار يقع
حق المساكيييين إتقلع
حيكومه تسرق بي طمع
وأنتي الضحك دار يشرطك ...
أرضك بتشكي من الشقوق
والدم جمد فوق العرووق
عمرو التحت ماببقي فوق
شوفي الغبار الكندكك ....
عمرو الضحك مافشه زول
تتفشي في الوطن البتول ؟
وريني لو كان ليكي قول ؟
ياضاحكه في عز محنتك ...

الكلام ده يا شجون
يشبة الرائع الراحل المقيم الاستاذ (ربنا يرحمه ويحسن اليه)
وصديقى غصباً للظروف والحال الحرن...

يا كردى الكلام ده يحتاج نقاش اكبر من ناس ذوى شان بقرض القصيد للفحص والتمحيص والرصد وده راى شخصى فقط.
تسلم كثييير
خار النص
فى العيد انشاء الله فى امكانية نجمة وامراء؟؟

حبيبنا عبد الله
زمن العشر حبات رحل وولي
والدنيا متطوره لابد من التماشي السريع معها خاصة في المفردة
اما بخصوص التمحيص فلك ذلك
اما عن النجمة والامراء ليس هناك شئ واضح في ذلك
وطبعا العيد دا بنكون مشكولين مع عرس اشرف والترتيبات مما يجعلني بعيد عن تلك الحيثيات
لك ودي

شجون كتب:

ابو مريم كل سنة وإنت بخير..
اولا" أنا من عشاق الشعر عامة" وكردي كتاباته رائعة فأحيانا عندما يجعل ستو وطنا"تشعر كأنك مواطن في وطنها ولكني لدي مايمنعني أن أعلق سياسيا"..أما إن جعل ستو حبيبة فتشعر كأنك تخاطب حبيبتك أحيانا"فأنا شخصيا أتمني أن أكون ستو تلك الملهمة لكن هيهات يا ع الله.لكم التحية..

الرائعة شجون :
تحياتي
ناديت عليك ماجاني رد جاني الصدي وقال ماكي في ...
مندسه وين وأنا في رجاك في عز شقايا ومنكفي ...
كرهان نظام دقن الضلال راجيكي تديني الدفي ...
وتطمني القلب العكر لمتين تجيهو تلطفي ؟
أنا زول بريدك ومشتهيك أنا في غرامك زول وفي ...
مامن شباب زمن الفساد وإنتي البراكي بتعرفي ...
شديت رحالي عشان أجيك شان لي دموعي تكفكفي
لكني خايف من هواك وخايف تجوري وتخلفي ...
وتنسي إني ميت في هواك ويمكن تكابري وتحلفي
في الساعة ديك تبقي القيامه ..
تطلع رويحتي مع السلامه ..
وأكره مطيرتك ياغمامه حتنزفي ...
ومابتنفعك تاني الدموع مهما كمان تتأسفي

طالما ان هنالك تقارب في وجات النظر والحب العميق للراحل المقيم حميد
اليكم بعض الكلمات التي احس بانني كتبتها بلسانه
مع وضع الفروق بين القلمين
نظامكم ياضلالية نظام السحت كلو نفاق ...
ولو قررنا نحنا نثور بنطلع ناس شذاذ آفاق ...
أنحنا حلفنا مانسكت ولا نصبر علي العيشه اللي مابتنطاق
رجال نحنا وضكاري يمين نسد عين الشمس إشراق ...
ولابنخاف سلاح بوليس ولا بنمل من الساساق ...
نحب هادي البلد بالجد نوهدبا من قلوبنا أشواق ...
غلابه تعابي سهرانين بنفدي بلدنا بالأعناق ...
من السرق العرق والحق صدرنا يمين عليكم ضاق ...
وفي الآخر يبين الحق عكارنا بيصفي بالرواق ...
تغور دقن الضلال وتفوت ولا أسفا" علي الإطلاق

كان لابده من أكتب
مهما أكون تعبان
شان ستو تستاهل
أملاها شوق وحنان ...
تعبي العلي هييييين
بيهون عشان إنسان
أداني حنو كتييييير
ضماني بي تحنان ...
ستو الحلم كلو
ولابده أوصلو
شان ستو هي أقلو
أجمل بني الإنسان ...
أنا روحي دار تمرق
حايشيلا ملك الموت
كان لابده من أكتب
قبال رويحتي تفوت
وأملاكي أحرف شوق
صادقات مدي الأزمان ...
ياستو ضميني في حضنك
الدااااافي
أحميني من دنيا سرقت
من أوصافي
شالت مشاعري زماااان
وانا زاتي كت مافي
ما الدنيا أعيتني
وأنا هسه زول عيان ....
لابده من أكتب
أحرف تفيض ريده
شان ستو إنسانه
عمرانة بالريده
رغم المسافه البين
قلبينا هي بعيده
وممتده في الخاطر
إحساس طري ونديان ...

صاحب البوست يعتزر ليومين القادمين ان شاء الله


سوف يبتعد لو قليلا لاسباب عقد العريس اشرف كردي
ترقبوني قريباً

شلته أحزاني وفقدتك
ياحبيبه تفيض معاني ...
والحزن فارد شراعو
في بحر كره المواني ...
وكل مركب ريد تعدي
تشتهي الدرب اليودي
لي عيون ستو الأماني ...
ستو ماظنيت تعرفي
إني غيرك زول بعاني ...
بفرد الدمعات وساده
والتعب محتل كياني ...
وأفضل أرجاك ليلي كلو
وأحسب الليل بالثواني ...
شان عيونك يوم يطلو
أبقي صاحيلن ..... أقلو
يا البعادك كيف أزاني ...
ستو جمبي ولا يهمك
أخدي راحتك وكلميني
نحنا ناس الله البنضحك
رغم جور حزنك وسنيني
ورغم محنتنا العلينا
برضو نكتب في الأغاني ...
ستو ضحيت شان غرامك
بي وطن ضاق المراير
فيهو مولودين غلابه
تلقي بالم ديمه حاير
ويوم يضيق الكون عليهم
يدمنوا النوح والسجاير
وطالما ضحيت عشانك
إنتي برضك ضحي شاني ...
ستو والناس اليتامه
أغلي عندي من الجواهر
ستو والناس التعابه
فيني ريدم بان وظاااااهر
وأي زول داير يشوفو
يرجي آخر الليل يساهر
لمن النجمات يمرقن
في السما وزي الأزاهر
يوم تغيب ستو وتودع
دنيا عاشت بالمظاهر
أصلو ستو قمر بلادي
لليغالط واليكابر
ستو غنوات ماها ساقطه
ماشعر يتقال وعابر
ستو كلمات مارقه تدي
وتبقي زاد لي كل مسافر
تارك البلدات مهاجر
من وطن مجروح يعاني .

شلت أحزاني وفقدتك في زمن كره المواني وكل مركب ريد تعدي..
شكرا كردي ستار ومذيد من الإبداع

بلسم كتب:

شلت أحزاني وفقدتك في زمن كره المواني وكل مركب ريد تعدي..
شكرا كردي ستار ومذيد من الإبداع

تحياتي بلسم
حضورك ومرروك اسعدني

لو جيت أفتش ليكي أنا
حا يبقي تامن المستحيل ...
معقول أعود أنا من جديد
لي زوله فاتت من قبيل ؟
إنسانة مابتعرف وصال
وماقدرت دمع الرجال
زول ضاق جمال الدنيا كيف
من تاني يرضي يعيش ذليل ؟
العيشه في كنفك عذاب
في دنيا غرقت في السراب
أنا كنت عاديك أمنية
لكن طلعتي وهم عديل ...
أنا كنت واقف وبندهك
ناديت عليك نبهتلك
لكنو صوتي طلع حزين
مجبور أفتشلك بديل ...
ومشيت وحلمي معاكي ضاع
يابت بتنسج في الخفا توب الخداع
غداره خاينة ومجحفه وبلا نفاع
يازوله تنهش في حشاي زي الضباع
مابتعرف الصبر الجميل ...
الدنيا مابتقيف عليك
ماترجي إني أقوم وأجيك
أنا من زمان كان رايي فيك
إنك ولاكي شبه مقيل ...
يكفيني عاشق ها البلد
ماظني غيرو ألاقي حد
أنا ود بلد ومن ها البلد
ماببكي قلبي الإتهرد
أنا صبري زي صبر الخليل ...
إنتي الحتخسري للرهان
غداره زي طبع الزمان
لا ليكي عشره ولا أمان
وأنا لسه إنسان برضي نيل ...
غيرك بريد أنا من جديد
طيف ستو بان ييداك بعيد
جاياني من زمنا" سعيد
تملاني ريد حتي الوريد
وهي القادره لي
ماضيك تزيل ...

اذا ماغبتي من دنياي
ده حالي وراكي ياستو...
بكون إنسان وعايش ساي
وعايني براكي في الصوره ...
بقلع قلبي بي دقاتو
وأودع زي روايع فاتو
سابو الدنيا شان هي بلاك
مسيخه وتبكي معبوره ...
قلب زي ده محال
حيخشو غيرك زول ..
قلب مديكي أحلي وداد
وماعرفت ورودو ذبول
تعيشي براكي يا ستو ...
أنا الجيتك وعليكي دخيل
عليكي سلكته مجري السيل
ورمال الوادي مافي ضليل
سموم وهموم أواخر الليل
مسافر وجايي ليكي رحيل
أفتش ليكي وينو شليل ؟
لقيتك تبكي معبوره ...
سألتك شن مبكيكي ؟
إجابتك واضحه في عنيكي
وكان وجعك من الفيكي
وجع باااااااااين مغطيكي
من التعب الغدر بيكي
قلم تصحيح وسبوره ....
بتشرحي إنتي في الخاطر
تعاقبي الناسي مو فاكر
وإذا ما الفسحه حانت ليك
تقيفي تقيفي مأموره ....
تجيني براكي بالأشواق
تحاربي زمن قدر ماضاق
تضيق الدنيا بي سوره ...
بحبك وإنتي بتغيري
ولاك مهتمه بي غيري
براااكي الشاغله تفكيري
وموسمه فيني تاج وإكليل
نجيمه تضوي دبوره ...

غدارة خاينة ومجحفة وبلا نفاع..
شكرا كردي ستار ومذيد من الإبداع